CYMA leh MJA-in 'Zirna Uar' an sawiho

Central YMA Kumpuan Sub-Committee leh MJA member-te chuan nimin khan CYMA Committee Room-ah YMA kumpuan, 'Zirna uar' chung­changa hmalak dan tur an sawiho.

Sawihona hun hi CYMA Kumpuan-Sub Committee chairman Lalhmachhuana, CYMA vice president-in a kaihruai a, CYMA president Vanlalruata leh MJA president Zonunsanga Khiangte-te'n thu an sawi. CYMA Kumpuan Sub-Committee secretary Lalrinmawia'n an hmalak tawhnate leh an hmachhawp hrang hrangte a sawifiah hnuah sawiho a ni.

Vanlalruata chuan, kum 1984 vel aṭangin YMA-in kumpuan a neih ṭan thu sawiin, "Kumpuan atan thil chi hrang hrang thlan a ni ṭhin. A hlâwk a ni ang, tihtawp aiin chhunzawm zel a ni. Thil ṭul tam tak karah tunah chuan zirna uar-ah kan lut leh a ni. Central service-a Mizo ṭhalaite luhtir tam tum ngawr ngawr piah lamah, kan khawtlang nun atan zirna uar a pawimawh," a ti.

Zirna lama kal nat a nih chuan kawng tinrengah hmasawnna a awm tur thu sawiin CYMA President chuan, "Vawi leh khatah kan vai êng duak lo ang a, theihtawpa hma kan lâk chuan awmzia a nei ang. IAS, IPS, etc. nih tum pawh an awm ang a, mi zawng zawng ban phâk a ni lo. Chuvangin, zirna pangngai piah lamah skill development hi kan rilruah a awm tel," a ti a; zirna buaipui nachang hre lo an awm chu a veiawm thu a sawi.

Zonunsanga Khiangte chuan, zirna lama hmalaknaah hun duh rei deuh leh hun duh rei lo deuh a awm thu sawiin, "A short term atan chuan central service lama inziak tling an awm theihna atan ṭan lâk vak a ṭul. Zirlaite'n an zirlai bâk an chhiar ta lo lutuk hi ṭan an lak a ṭulin ka hria. Elementary lamahte hian ṭan lâk a ngai hle," a ti.

Lalrinmawia tarlan danin, January 24, 2020-ah Vanapa Hall-ah CYMA kumpuan hawn a ni. Hmalakna tura hmachhawp ṭhenkhatte chu - zirlai hruaitu leh zirtirtu pawl hrang hrangte sáwma seminar buatsaih, video clip insiamsiak, zirna-ina thawktute thawhhopuia sâwm, zirna uar kaihhnawiha article ziak tura mi thiam bikte sàwm leh, talk show buatsaihte a tel.