CTS block zingah Mizorama bank 3 an tel MCAB-in harsatna a awm loh thu an puang

Reserved Bank of India (RBI) thuchhuah angin, India rama bank eng emaw zat, Yes Bank hnuaia CTS zawmte chu CTS clear phalsak an ni rih lo (block) a; chu'ng zingah chuan Mizoram Rural Bank, Mizoram Cooperative Apex Bank leh Mizoram Urban Cooperative Development Bank-te an tel.

Hriattirna (notice)-a a lan danin, Yes Bank chu an tlakchhiat hnaih avangin khuahkhirh mek a ni a, hun eng emaw ti chhung atan CTS clearing tih phalsak a ni lo. Yes Bank ang bawkin CTS clearing chungchanga Yes Bank zawmtu bank eng emaw zat chu CTS clearing tih phalsak an ni lo bawk.

State Bank of India (SBI)-a officer pakhat chuan, CTS (Cheque Truncation System) chu cheque collection tihna system a ni a, tun hmaa clearing house thlaktu a nih thu a sawi a; CTS-ah hian Mizoram Rural Bank, Mizoram Cooperative Apex Bank leh Mizoram Urban Cooperative Development Bank-te'n Yes Bank an zawm avangin RBI thu angin block an ni ve mai nia a hriat thu a sawi bawk. SBI officer pakhat chuan, CTS clearing block chung­changah hian Mizorama bank-te'n harsatna an tawh a rin loh thu leh anmahni dawrtute tan pawh harsatna a awm loh tur thu a sawi a ni.

Mizoram Cooperative Apex Bank (MCAB) chuan thuchhuah siamin, tun hnaia Yes bank-in harsatna a tawhah hian MCAB customer-te tan pawisa dah luh leh lâk chhuah kawngah harsatna a awm loh thu an tarlang a, "Pawisa dah luh leh lak chhuah hi dan pangngaiin bank branch leh ATM aṭanga tih theih reng a ni a, IMPS hmanga pawisa inthawn kawngah pawh harsatna a awm lo," an ti.

MCAB chuan, RTGS/NEFT hmanga MCAB-in pawisa inthawn tawnna atana Yes Bank a hman ṭhin chu a remchan rih tâk loh avangin RTGS/NEFT hmanga pawisa thawnna atan IFSC code - HDFC0CMCABL (SHFCZeroCMCABL) hmangin tih theih a nih thu an tarlang bawk.