MLA ni mek zinga 32-in car leina an la tawh Motor leina la lo awmchhun Brig. T Sailo

Kum 2018-a Mizoram Legislative Assembly inthlanpuia thlan tlin MLA zingah, Assembly term tina MLA-te motor/car leina pek tur chu MLA 39 zinga 32-in an la tawh. Legislative Assembly term kal tawha MLA zawng zawngin car leina sorkarin a pek sum an la deuh vek a, Brig. T Sailo chu la lo awmchhun niin, kum 1998-2003 chhung khan a la lo a ni.

Vanglaini-in RTI Act tlawhchhana zawhna a siam, Assembly Secretariat-in a chhan danin, MLA-te hnena motor leina pek ṭhin hi kum 1998-2003 Legislative Assembly term-ah inpek ṭan a ni a; kum 1998-2003 aṭanga term kal mek 2018-2023 thlengin MLA eng emaw zat an awm tawh a, motor leina pek an ni hlawm.

Mizoram state Legislative Assembly term palina, kum 1998-2003-ah MLA tin hnenah lirthei leina Rs. 4,00,000 zel pêk a ni a; hemi term-ah hian MLA pakhat - Brig. T Sailo chuan motor leina tur sum a la ve lo a, MLA dang 39-te erawh chuan an la thung.

Legislative Assembly pangana, kum 2003-2008 chhung khân motor leina chu Rs. 5,50,000-ah tihsan a ni a, MLA 42 hnenah pek a ni. He term-a MLA RM Chakma chu May 10, 2006-ah a báng a, a aiawh turin by-election-ah Alok Bikash Chakma thlan a ni a, July 1, 2006-ah MLA ni lai Sainghaka a thi a, a hmun ruak luah tur thlanna by-election-ah Lalchhandama Ralte thlan a ni. MLA pahnih bâng leh thih vanga MLA thar pahnih an awm avangin he term-ah hian MLA 42 an awm a, motor leina pawh mi 42 pek an ni.

State Legislative Assembly parukna, kum 2008-2013 chhungah MLA-te tana lirthei leina pawisa chu tihsan leh niin, mi pakhatah Rs. 6,50,000 pêk a ni a; he term-ah hian member pakhat, Chawngtinthanga a thih avangin a hmun luah khat turin Dr Ngurdingliana thlan a ni. Tichuan, Assembly Secretariat chuan MLA 41 hnenah lirthei leina a pê.

State Assembly pasarihna, kum 2013-2018 ah pawh MLA-te lirthei leisakna sum pek chu term hmasaa Rs. 6,50,000 aṭangin Rs. 8,00,000-ah tihpun a ni leh a, MLA 40 hnenah lirthei leina pêk a ni. Tuna Assembly term kal mek (2018-2023) ah pawh lirthei leisakna sum pek zat chu Rs. 10,00,000-ah tihpun a ni leh a; zawhna chhanna pek chhuah a ni lai thlengin MLA 32 hnenah motor leina tur Rs. 10,00,000 ṭheuh pêk a ni tawh. MLA ni mek 39 zinga pasarih hnenah pek a la ni lo.

Mizoram sorkarin MLA-te an mimal lirthei tur a leisak ṭhinah hian sorkarin driver pakhat a chhawrsak thei a, driver a chhawrsakte chu sorkar driver pay scale ang hlawh pek an ni a, annual increment erawh a pe ngai lo. Driver-te chu MLA nih chhung zawng chhawr theih leh MLA nih loh ruala châwl ve mai tur (co-terminus) an ni.

MLA-te private driver-te hlawh atan March 2002 aṭanga December 2018 thleng khan Rs. 8,46,67,353 pek a ni tawh. MLA-te chu kum 1998 aṭangin lirthei leisak ni mah se, kum 2002 hma lama driver-te hlawh bik pêk dân hriat a ni lo a, Assembly Secretariat-in record a neih tawh loh vang a ni.

Mizoram MLA ni tawh zingah, lirthei leina ṭum nga dawng tawhte zawhna chhangin Assembly Secretariat SPIO chuan, Nihar Kanti Chakma chiah MLA zingah car leina tur ṭum nga dawng tawh a awm thu a tarlang.

MLA-te sorkarin lirthei a leisak chungchangah hian Assembly-ah dân siam a ni a, 'Fixation of cost of vehicles of members' tih a awm a, The Mizoram Salaries, Allowances and Pension of Member of the Legislatives Asemby Act, 1999 Section 12(1)-ah chuan, MLA-te lirthei leisakna zat tur chu Assembly General Purpose Committee-in a bithliah tur thu a chuang.

Assembly term kal meka General Purposes Committee member-te January 9, 2019-a ṭhukhawm chuan, kum 2018-2023 chhunga MLA-te lirthei leina atana sorkarin sum a pek zat tur chu MLA pakhatah Rs. 10,00,000 zel ni turin an bithliah. Assembly GPC-ah hian chairman chu Lalrinliana Sailo, speaker a ni a; sorkar lai MNF member aṭangin Chief Minister hoin mi 13 awmin, opposition lamah ZPM leh Congress aṭangin an leader ve ve an awm a, sorkar official panga an tel bawk.

Mizoram Assembly GPC member ni mekte chu - MNF aṭangin Zoramthanga (CM), Lalrinawma (deputy speaker), TJ Lalnuntluanga, Ramthanmawia, Dr R Thiamsanga, H Biakzauva, K Pachhunga,

H Lalzirliana, C Lalmuanpuia, F Lalnunmawia, L Thangmawia, Vanlalṭanpuia leh Lalrinsanga Ralte te an ni a; Congress member aṭangin Zodintluanga Ralte leh ZPM member aṭangin Lalduhoma te an ni.