Kum 2019-a khaw lum ber ní - April 18

Tunlai hi nipui lai a ni a, khaw lum hun niin, Mizoram mai bakah, India ram hmun tam zawkah khaw lum lai ber hun a ni. April 18 khan kumina khaw lum ber ni a ni a, hun kal tawhte nena tehkhin erawh chuan, khaw lum ber ni a tling pha lo.

Directorate of Science & Technology chuan kum eng emaw ti kal ta aṭang khan Mizo­­rama sik leh sa dinhmun an chhinchhiah ṭhin a; an chhinchhiah danin, kumina khaw lum ber ní (temperature san ber ni) chu April 18, Zirtawpni kha a ni a, Celsius degree 36.3 a tling. An chhinchhiah china Mizorama khaw lum ber ni erawh chu April 13, 2017 kha a ni a, Celsius degree 36.5 niin, temperature tehnain chu aia sang chu a la kâwk lo a ni.

Tunlaia Mizorama khaw lum chungchangah hian April 18, 2019 khan Science & Technology conference room-ah Science & Technology-a chief scientific officer Dr RK Lallianthanga leh senior scientific officer Samuel Lalmalsawma te hoin officer te, Mizoram Remote Sensing Application Centre (MIRSAC) leh Mizoram Science, Technology & Innovation Council (MISTIC)-a scientist-te an ṭhukhawm a, khaw lum chhoh dan an zirho.

Chief scientific officer (CSO) Dr RK Lallianthanga chuan, khawvela sik leh sá danglam zelah Mizoramah pawh a danglam ve zel a, khua a lum telh telh tih sawiin, "Chu chuan kan ni tin nunah leh kut hnathawktute ei leh bar zawn kawngah thûk takin nghawng a nei," a ti a; scientist-te chu fuihin, "Hetiang thilah hian mipui hrilh tur leh kawng ṭha dappui turin Mizoram mipuite'n min thlír a, nasa zawka ṭan lâk a ṭul a ni," a ti.

Meeting-ah hian scientific officer i/c Meteorological Centre K Lal­rammuana'n kum 10 chhunga khaw lum leh vawh dan powerpoint presentation hmangin an sawifiah a; Aizawlah a kum têlin khua a lum telh telh a, khaw vawt pawh a vîn tial tial a, temperature hniam lai ber a hniam telh telh thu a sawi.

K Lalrammuana chuan, media ṭhen­khata April 16, 2019-a khaw lum záwng Celsius degree 35.20 chu Mizorama khaw lum ber ní anga tarlan chu hriat sual palh a nih a rin thu a sawi a; record an neih chinah, Aizawla khaw lum ber ni chu April 13, 2017 (Celsius degree 36.5) a nih thu a sawi a ni.

Meteorological Centre-a tehnaah chuan, April 18, 2019 kha kum 2019 chhunga khaw lum ber ní a la ni rih a, a lum zawng tehnaah Celsius degree 36.3 a tling tih, K Lalrammuana chuan a sawi a; tun aia a lum zel dan tur erawh sawi lâwk a har a, ruahtui tlâk dan azirin a lum belhin a lum belh loh theih thu a sawi bawk.

Directorate of Science & Technology hian meteorology lamah hma lain, Directorate of Economic & Statistics nen ṭang dunin district hrang hrangah Meteorological Station an din mek a, India Meteorological Department (IMD) nen pawh ṭanghoin hma an la mek a ni.