PAHOSS-ah dilna 344 a lut tawh Dilna 279 pawm lailâwk a ni

Mizoram sorkarin traffic jam tihziaawmna atana ruahmanna a siam, Parking House Support Scheme (PAHOSS) hnuaiah mi 344-in dilna an thehlut tawh a, chu'ng zinga 279 chu pawm lailâwk a ni a, enfiah nawn leh tur a ni.

Vanglaini palai zawhna chhangin UDPA secretary Dr C Vanlalramsanga chuan, April 2019 tìr lama PAHOSS Executive Committee an ṭhutkhawm hnuhnun ber ṭumin PAHOSS hnuaia ṭanpuina dilna 344 a luh tawh thu a sawi a, "Dilna lutte hi an hmunhma enfiahsak zel a ni a, mi 279-te chu ṭanpuina pek tlaka ngaih an ni. Anni pawh hi an hmunhmate zirchian leh an ni ang. Dilna a la luh belh reng bawk," a ti.

UDPA Secretary sawi danin, PAHOSS atan hian Aizawl chu zone pathum - North, West leh South zone-ah ṭhen a ni a; dilna lutte chu a hmunhma UDPA aiawh, a awmna local council aiawh leh traffic police aiawhte'n an enfiah ṭhin. Enfiah tawh zinga ṭhenkhat chu kawngpui hlat lutuk avang leh lirthei leng thei tur zat bituk a len dawn loh avangin hnâwl a ni.

PAHOSS hnuaiah hian Bawngkawn - Sikulpuikawn, Sikulpuikawn - Kulikawn leh Sikulpuikawn - Khatla main road hnaiha hmunhma neite chu ngaih pawimawh hmasaka neih tura tih a ni.

Dr C Vanlalramsanga chuan, PAHOSS hnuaia ṭanpuina chu instalment thuma pek tur a nih thu sawiin, "Ram ringawt nei, parking atana engmah la ti lote chu in an sak hnua parking-na tur an sak thlen hunah first instalment pek an ni ang. Parking atana rem sate chu first instalment pek nghal theih an ni. Model Code of Conduct zawhah pawisa pek chhuah theih nghal kan inbeisei," a ti.

PAHOSS atan hian sorkar kum liam ta 2018-19 khan cheng vbc. 10 vel dah a ni a, chu chu hman hman a ni lo. Car pakhat zel dahna atan Rs. 1,00,000 leh two wheeler paruk zel atan Rs. 1,00,000 pek tur a ni.

PAHOSS tlangzarh a nih ṭumin chief minister Zo­ramthanga chuan a sawifiah a, "Sorkar ṭanpuinaa parking house sate chuan an parking house-a motor dahte aṭangin dah/luah man an la thei ang. Sorkarin cheng nuai chuti zat kan pe che u a, motor pakhat fee-ah cheng chuti kan hauh ve e, tih kan tum lo. A vaiin a neitu'n pumbilh vek rawh se, nuai sawm télin kan va ṭanpui tawp ang kan tihna a ni," a ti.