KHAWTHLIR
Thubuai zirho
Mizoram State Legal Services Authority (MSLSA) buatsaihin nimin khan Economics and Statistics conference hall-ah hliam leh intihnat kaihhnawih thubuai chungchang zirhona 'Workshop on Medico Legal Cases' neih a ni. Workshop hi MSLSA member secretary, Vanlalenmawia'n a kaihruai a, MIMER director Dr. L Fimate, State Medico Legal officer Dr. Lalringmaia, Kulikawn Hospital-a psychiatrist Dr. Ruth Lalmuanpuii leh Forensic Science Laboratory director Sangchungnungaten hriat tur pawimawh hrang hrangte an sawifiah.
Adolescent Health Day
Nimin khan Evangelical Church of Maraland, Siaha New Colony Hall-ah Adolescent Health Day hman a ni a, mipa leh hmeichhia kum 10-19 inkar sikul kai tawh lo, nupui/pasal nei tawhte an tel. He hunah hian chaw ṭha ei pawimawhzia te, tleirawl laia nau pai ṭhat lohzia te, sexual reproductive health, ruih theih thil hmansual ṭhat loh ziate leh natna inkai chhawn theih loh natnate inzirtir a ni.
Hospital report
March 2019 chhung khan Aizawl Civil Hospital-ah mi 26,071 an inentir a, mi 1,202 admit an ni. March thla chhung khan nau piang 358 an awm laiin, mitthi 63 an awm a, hlamzuiha thi pakhat a awm. Damlo inentir zinga 168 chu Mizoram páwna inentir tura tih an ni.
AVBD lawm
Association for Voluntary Blood Donation (AVBD), Serchhip Branch chuan thuchhuah siamin, kum 2018-19 financial year chhunga Mizorama district zingah Serchhip district-in a thlawna thisen pe (voluntary blood donation) sânna ber dinhmun a luah chu lawmawm an tih thu an tarlang a, "Hetiang kan thlen theih chhan hi tlawmngai pawl hrang hrang, kohhran ṭhalai pawl, NSS volunteer leh mimalte tlawmngaihna leh blood bank-a thawkte inpekna vang a ni," an ti. Kum 2018-19 chhung khan Serchhip District Hospital-a thisen pek zawng zawng unit 1,085 zinga 1,055 (97.23%) chu a thlàwna pek a ni.