An candidate vote-tute chungah ZPM Leader-in lawmthu a sawi

Nimin khan ZPM chuan an pisaah chhung inkhawm an hmang a, ZPM leader K Sapdanga chuan thu sawiin, Lok Sabha inthlan leh Assembly by-election-a an candidate vote pui­tu zawng zawngte chungah lawmthu a sawi.

Inkhawm hi ZPM senior vice chairman Kenneth Chawngliana'n a kaihruai a; K Sapdanga chuan, inthlan zawh takah an candidate-te huaisenna, taimakna, tumruhna, ram an veizia leh ṭhalaite eizawnna an veizia a lan thu sawiin, "An chhuanawm tak zet a ni. An khingpuite'n nasa taka dâwt hmanga an sawichhiat mawlh mawlh pawhin tumah an sawichhe ve duh lo te, anmahni campaign puitute pawh tumah sawichhe lo tura an ngen tlatte kha chhuanawm kan ti hle a ni," a ti.

K Sapdanga chuan, ZPM-a beiseina sang tak lo nei tawh mi tam tak chu MP inthlana páwl dangte nen candidate inṭâwm an siam avangin an rilru a ná tih an hriat thu sawiin, "An rilru nat chhan kan hriatthiampui. BJP leh a policy-te do hneh ngei tura kil hrang hrang aṭanga thurawn a awm avangin, candidate inṭâwm siam kha a ngai a ni tih erawh hrethiam turin kan ngen nawn leh a ni," a ti a; ZPM-a beiseina nei tawhte chu hnual mai lo turin a chah.

Kum 2020 chhungin village council, local council leh AMC inthlante a awm dawn tih sawiin ZPM Leader chuan, mahni awmna ṭheuhah, mal ṭan pawha chak ngei tura inbuatsaih turin ZPM worker-te leh mipuite a ngen a ni.