HIV/AIDS beihpui thlak tur sawiho
National AIDS Control Organisation (NACO) aiawh te, Centre for Disease Control (CDC) hotute leh HIV/AIDS dona lama thawktu pawl lian ṭhenkhat aiawhte chu Mizoramah an lo zin a, nimin khan Mizoram State AIDS Control Society (MSACS) hotute nen inkâwmin, Mizorama HIV/AIDS dona beihpui thlak dan tur an sawiho.
NACO chuan Integration HIV/AIDS Action Plan for Mizoram a ruahman a, hei hi kum 2019-20 chhunga hman tura tih a ni. Ruahmannaah chuan kohhran leh khawtlang lam HIV donaa hma an lak zau lehzualna tura anmahni dawr dan tur te, Aizawl páwn district hrang hranga HIV dona lama hnathawh tihchak dan tur te, tum bik neia hmalakna (Targeted Intervention) hnuaia inchiu ṭhinte leh hmeichhe inzuarte enkawlna tihchak dan tur te, ART damdawi sem chhuahna leh thisen endikna lam tihchak dan turte a tel.
Meeting-ah hian Mizoram páwn aṭangin NACO leh CDC aiawhte bakah, FHI-360, SHARE India, I-TECH team leh NETSU aiawhte an tel a, MSACS Project Director leh hotu dangte an tel bawk. Tun kar chhungin Aizawl district bakah, Champhai leh Kolasib district-te an tlawh dawn a ni.