DGP-in Serchhip a tlawh

Mizoram Director General of Police (DGP) SBK Singh chuan nimin khan Serchhip a tlawh a, Serchhip SP conference hall-ah Police Samellan hmanpuiin, police-te chu ṭha taka hna an thawh theih nan an taksa vawng uluk turin a chah.

DGP chuan, Mizoram police-ah thawktu indaih lohna nasa tak a awm thu sawiin, "Hemi sukiang tur hian Chief Minister hoa hmalak a ni. Kumin chhungin thawktu lak belh tum a ni a, quarters leh lirtheia harsatna awm mek chinfel nan Ministry of Home Affairs-ah cheng vbc. 367 vel dil niin, hmuh theih ngei beisei a ni," a ti. Police-te chu ram tana an theihna zawng zawng nena hna thawk turin an hriselna ngai pawimawh turin a fuih a, insawizawi uar a, zu leh ruihhlo dang laka inthiar fihlim turin a chah bawk.

DGP hian Serchhip District NGO Coordination Committee hruaitute a kâwm bawk a, NGO-te nen thawhhona ṭha tak an nei chu lawmawm a tih thu DGP chuan a sawi. Serchhip Police Station, Serchhip Bazar leh Serchhip Sailiamkawna CCTV camera bun thar chu a hawng nghal bawk a ni.