Aizawlah Edufest 2019 ṭan a ni

Edufest 2019 chu nimin khan Vanapa Hall-ah ṭan a ni a, MJA General Headquarters president Zonunsanga Khiangte-in a hawng. Edufest vawi 19-na hi vawiinah chhunzawm a ni ang.

MJA president chuan, Lynchpin leh Zalen chanchinbuin Mizoram zirlaite tan zirna lama duh thlan theihna Aizawlah ngei an chhawpsak ṭhin chu ṭha a tih thu a sawi a, "Edufest hian zirlaite hnenah malsawmna thlen se, heng aṭanga zirna ṭha hmua zir chhuakte kan ram leh khawtlang tan mi ṭangkai an nih theih nan duhsakna ka hlan a ni," a ti.

Zalen editor Vanlalrema Vantawl chuan, Edufest-ah tel tura tihfel vek tawh, Aizawla thlawhna thlawk a tlem vanga harsatna a awm avang­in tel thei ta lo an awm thu a sawi rualin, institution ṭha leh lâr tak tak eng emaw zat an tel thu a sawi a; 'Edufest' tih hming chu registration fel taka ti an nih avang leh an brand name a nih tawh avangin, Mizoram hmun dangah mi dangin 'Edufest' tih an hman ve ngawt a thiang lo a, hmang an awm chuan Court-a an kal mai a ṭul tur thu a sawi bawk.