Sorkar tharin thla li chhung lekin Hna a thawk hnem hle - Nunmawia

MNF MLA prof. F Lalnunmawia chuan nimin khan Mizo Hnam Runah thu sawiin, "Kan sorkar thar hian theih­tawp chhuahin kawng hrang hrangin hma a han la chho a, thla li lek chhung hian hna pawh a thawk hnem hle," a ti.

Sorkar thar hmalaknate a sawisel zawng hlira thlir loa, sorkar hmalaknate thlawpa thurawn pe a, kan ram hruaitute ṭawngṭaipui ṭhin tura mipuite ngenin prof. F Lalnunmawia chuan, "Sorkar hnathawkte hi sorkar thapui ber an ni a, kan sorkar policy leh programme-te tihlawhtling tura kan kutke pawimawh an ni. Kan Sorkar flagship programme SEDP pawh min tuipui ka beisei," a ti a, SEDP mipui, a bik takin mirethei leh harsa zawkte dawmkanna tur a nih thu a sawi.

Prof. F Lalnunmawia chuan sorkar hna leh mipui rawngbawl hna thawk chung hian hlawkna dang kan um lutuk palh em tihte pawh kan inenlet fo a ṭhat thu sawiin, "Ram hruaitu leh sorkar hnathawkte hian mawhphurna leh hamthatna (privilege) kan chelh leh neihte hi mahni inhaivur nan a ni lo tih hriat nawn fo a ṭul awm e. Department-te hian kalphung nghet taka kan lo neih tawh ṭhenkhat siamṭhat ngai a awm em tihte pawh inenfiah nise a lawmawm hle ang," a ti.