International Women’s Day hman a ni

Social Welfare depart­ment (SWD) huaihawtin nimin khan SWD hall-ah Poshan Pakhwada (National Nutrition Fortnight) leh International Women’s Day hman a ni a, SWD minister Dr K Beichhua'n a hawng. Nimin vek khan Mizoram District Legal Services Authority (MSLSA) huai­hawtin Central Jail-ah International Women’s Day hman a ni bawk.

Dr K Beichhua hian, Poshan Pakhwada a tlangzarh a; thu sawiin, Poshan Abhiyaan-in a tum ber - naupang ṭhanṭhú (stunting) te, taksa rihna san zawng nena khaikhina inmil lo lutuk (wasting) te, taksa rihna kum nena khaikhin a hniam lutuk (underweight) te, nausen piang hlim zâng lutuk (low birth weight) te, thisen tlakchhamna (anaemia)-te India ram puma tihhniam zel a lo nih nana hmalakna a nih thu a sawi a, "A tihhlawhtlin nan hmeichhia, a bikin nute an pawimawh hle a ni," a ti.

COVID-19 chungchang sawiin Dr K Beichhua chuan, "COVID-19 thih­puite hi taksa chak lo tê tê an ni a, ei leh in ṭha leh thianghlimin taksa hriselna leh natna kan do theihna a tihchak avangin kan uar leh zual a pawimawh hle dawn a ni," a ti a; Mizoram leh hnam a himna turin ei leh in ṭha leh thianghlim ei a pawimawh thu a sawi.

Rashtriya Poshan Pakh­wada (National Nutrition Fortnight) hi Poshan Abhiyaan hnuaiah March 9-23, 2020 chhunga hman tur a ni a; chumi chhung chuan nutrition lama inzirtirna chi hrang hrang kalpui a ni ang. International Women’s Day  pual hian Mizo hmeichhia, sorkar depart­ment-a director ni mek mi pakuate, Mizo hmeichhia charter accountant hmasa pathum - RS Roneihpuii, Laltluangkimi Chinzah leh Jewel Lalṭhasangzeli Fanai te leh FIH Rising Star of the Year 2019 Lalremsiami hnenah chawimawina an hlân. 

MSLSA chuan Mizoram State Commission for Women nen ṭang dunin Central Jail-a Women Cell-ah International Women's Day an hmang a, hmeichhe jail tángte nen an hmangho. Gauhati High Court judge Justice Michael Zothankhuma khuallian a ni a, Gauhati High Court judge Justice Nelson Sailo khualzahawm a ni.

Justice Michael Zothankhuma chuan, hmeichhiate'n right ṭha tak an neih thu sawiin, "Heti laiah hian in awm reng dawn lo a, danin a tih ang hi zawm hram in tum tur a ni. In chhuah hunah in fate leh khaw­tlang tan khua leh tui ṭha tak anga in awm theih a pawimawh a, society-ah in lêt leh tur a ni," a ti.

Jail administration leh Women Commission-te'n programme leh policy mumal tak siam se a duh thu sawiin Michael Zothankhuma chuan, "Jail aṭanga an chhuah hian mental trauma emaw, sex abuse emaw a awm thei a, chuvangin, anmahni enkawl zuina tur leh an hnathawh tur ngaihtuah a ngai," a ti a; an thubuai ngaihtuah kawngah puihna an dawn theihna hrang hrangte a sawifiah.

Mizoram hmun hrang hranga jail-te dinhmun chu inang tlang thei se a duh thu sawiin High Court Judge chuan, "Hengahte hian an hriselna an enkawl ṭha em tih te, Aizawl jail-a an neih ang an nei ve em tihte sorkarin a ngaih pawimawh a, a khairual a ngai hlein ka hria," a ti.

Inkhawmah hian Justice Nelson Sailo, Mizoram State Commission for Women chairperson Lallawmchhungi leh Prof. Zokaitluangi te pawhin thu an sawi a; chawhnuah hmeichhia jail-a tángte tan a thlawnin inentirna buatsaih a ni. Central Jail-a Women Cell-ah hian hmeichhia táng 75 an awm mek. International Womens Day hi March 8 a ni a, kuminah Pa­thianni a nih avangin nimin khan hman a ni.