KHAWTHLIR

J Thankima College-a NSS unit leh Red Ribbon Club-te chuan nimin khan an college-ah blood donation camp an huaihawt a, Aizawl Civil Hospital tan thisen unit 94 an pe a, a petute mipa 68 leh hmeichhia 26 an ni.

March 8, Pathianni chawhnu dar 1:30 vel khan Tuichawng-I khuaah chenna in panga a kâng ral. Thu dawn danin, kângmei hi Mritunjay (Joy-a) s/o Moroti Mohan in aṭanga chhuak a ni a, kângmei chhuah ṭan laiin a neitute an awm lo. Kângmei chhuah ṭanna in aṭangin bungrua chuh hman a ni lo a, in dang pali a kan kaite aṭang erawh chuan bungrua tlem azawng chuh hman a ni.

Association of South East Asian Nation (ASEAN) ram palaite (ambassador) chuan nimin khan Governor PS Shreedharan Pillai an kâwm a, Raj Bhavan-ah chawchhûn an kîlho nghal. He hunah hian Indo-Myanmar border area an tlawh thu ASEAN palaite chuan an sawi a, an ngaihdan leh hmuh danah chuan, Mizoram chu ASEAN ram leh India ram insumdawn tawnna atana pawimawh tak a ni tih an hmuh chian thu Larsap an hrilh.

COVID-19 chung­changah hian University Grants Commission (UGC) chuan central university zawng zawng leh an hnuaia college zawng zawng chu a ṭul anga hma la tur leh, campus chhungah punkhawmna lian tham buatsaih lo turin a ràwn a ni. UGC thurawn angin MZU chuan March 14, 2020 (Thawhlehni)-a Convocation vawi 14-na neih tur chu ṭhulh rih a nih thu nimin khan MZU chuan a tarlang.

Zemabawk Kawnvenga vantlang tuikhur (public point water borewell) chu nimin zing khan bial­tu MLA Zoramthang­a, chief minister-in a hawng.Tuikhurah hian lei verh ft. 800 hnuai aṭangin kháwl - borewell submersible pump set hmanga tui pump chhuah a ni dawn. Tuikhurah hian overhead tanky tui litre 9000 vel leng thei tur siam tel nghal a ni a, treatment plant siam tum a ni.

Phâwngpui tlanga Farpark panna kawng leh Mizoram sorkar rest house-te chu nimin khan bialtu MLA H Biakzaua, Agriculture Development Board vice chairman-in a tlawh a, Rs. 15,00,000 sénga sak Thaltlang community hall a hawng nghal. MLA hian Lawngtlai East bial chhunga Phawngpui National Park-a sorkar rest house thawm ṭhat dan tur leh a panna kawng siam ṭhat dan turte a enfiah a ni. Thaltlang khua hnenah table tennis board a pe a, Sangau damdawi-in (PHC) sak mek a enfiah bawk.

SIPMIU-in Ramthar Sihpui péng aṭanga Ramthar North thlanmual inkar kawngpuiah tui pipe phûm hna March 16, 2020 thleng an thawh dawn avangin, hna thawh chhungin he kawngpuiah hian lirthei engmah tlân phal a ni lo. Kawngpui sirah lirthei leh bungrua dah phal a ni lo bawk.

Mizoram University-a Department of Management zirlaite leh zirtirtute chuan March 7, 2020 khan Gan Sabra Society, Luangmuala awm naupangte an tlawh a, zai, lam, magic show leh infiamna hmangin hun an hmanpui. Thilpek chi hrang hrang an hlan bawk.