ARC-in an report CM-ah an thehlut

Mizoram sorkar inrêlbàwl danah ṭha leh hlâwk zawka mipui rawngbawl a nih theih dan zir chiang tura sorkarin a din Administrative Reforms Committee (ARC) chuan department hrang hrang an zirchianna 'Reports and Re­commendations of Administrative Reforms Committee Vo­lume-2' chu nimin khan chief minister Zoramthanga hnenah an thehlut.

ARC report-ah hian department ṭhenkhat - FCSCA (Legal Metrology), Transport department (MST Wing), Mizoram sorkarin a enkawl public undertaking ṭhenkhat te, board hrang hrang te, council-te leh society-te an zirchianna bakah, Mizoram sorkara group C leh D post ṭhenkhat outsource (mi dang hnena hlan) theih tur zirchiannate a tel.

Mizoram sorkara post hrang hrang, tunlai khawvela a hnathawh dan ena post ṭangkai tawh loa puan mai theihte leh paih ṭhen tura ṭha nia an hriatte pawh ARC hian an report-ah an tarlang. ARC hian kum 2018-a DPAR-in a din study group pangate'n department 10 - PWD, Sericulture, LAD, Home, Agriculture, Horticulture, PHE, LRSWC, Sports & Youth Services leh Health & Family Welfare-a manpower assessment an lo neih tawh report leh recommendation an thlirlet a, rawtna an siam thar nghal a ni.

ARC hian an report vo­lume 1 - 'Mizoram Houses & Streamlining of File Movement in Mizoram Secretariat' tih chu September  3, 2019 khan Chief Minister hnenah hian an lo theh­lut tawh a; an report hi Cabinet chuan pawmin, tun­ah hian Chief Secretary hoin tihhlawh­tlin dan ngaihtuah mek a ni. ARC-ah hian chairman chu Lalngheta Sailo, IPS (Rtd.) a ni a, member-te chu Nghaklianmawia, MCS (Rtd.), Lalthansanga, MFAS (Rtd.) leh K Vanlalrawni, MSS (Rtd.)-te an ni.