Riverine Reserved Forest chhunga Ram neite insawifiah turin hriattir an ni

Mizoram Riverine Reserved Forest (RRF) area huam chhungah high court thupek (order) avangin mimal ram leh sorkar ram la chinfel theih loh eng emaw zat a awm a, ram neitute chu insawifiah turin sorkarin a hriattir.

Environment, Forest & Climate Change (EFCC) leh Land Revenue & Settlement (LRS) department aṭanga Vanglaini thu dawn danin, kum 1965-a Mizoram RRF area-a puan hmun 16-ah mimal eng emaw zatin ram an nei a; chu'ng mimal ramte chu sorkarin neih lêt tumin hma a la a, ram neite chu insawifiah turin hriattirna (showcause notice) a pe a ni.

Sorkar hotute chuan, RRF huam chhunga mimal ram neite chu insawifiah tura hriattirna pek an nih rualin, high court order avangin hmalak chhunzawm theih a nih rih loh thu an sawi a, "National Green Tribunal (NGT)-in forest reserved area huam chhunga mimal ram neite zawng chhuak a, cancel tura a tih angin April 13 & 16, 2020 khan EFCC leh LRS department chuan reserve area chhunga mimal ram neite zawn chhuahna tur order kan ti chhuak a, heng hmuna huan/ lo/ ram neite chu sorkarin a laksak lohna chhan tur insawifiahna hun pek an ni," an ti.

Department hotute chuan, "Hmalak mek a nih laiin January 27, 2021 khan Gauhati High Court chuan Mizoram sorkarin RRF-a a lo puan tawh chu danin a phût ang tifamkim loa puan a ni tiin thu tlingah a pawm lo," an ti a; chu vang chuan cancel emaw, thutlukna dang siam emaw turin tih theih an neih rih loh thu an sawi.

Sorkarin RRF-a a puan hmuna mimal ram neite chu LRS department-in an endik tih sawiin, "District hrang hranga department hotute hriattirin RRF chhunga ram neite zawng chhuak turin kan ti a, hmalak mekna a nih avangin ram nei zat chiah hriat theih a ni lo. Chutih laiin, high court thuchhuak avangin cancel lam hawia hmalak chhunzawm theih a ni rih lo," an ti.