COVID-19: Mizoram dinhmun Hripui vei mi 9 hmuh belh a ni
April 5, Thawhṭanni khan Mizoramah Covid-19 vei mi pakua hmuh chhuah a ni a, kumin January 21 hnua hmuh chhuah tam ber ní a ni. Nimin khan hripui laka fihlîm tawh mi pathum chhuahtir an ni thung.
Covid-19 vei hmuh thar mi pakuate chu ZMC laboratory-a hmuh chhuah mi pahnih leh RAT hmanga hmuh chhuah mi pasarih an ni a; TrueNAT-PCR hmanga endik zingah hripui vei an awm lo. An zinga pahnih chu tualchhunga kái an ni a, mi pasarih chu tun hnaia state pawn aṭanga rawn lut an ni.
Hripui laka fihlim tawh nimina chhuahtirte chu SRH-ZMC aṭanga chhuak mi pahnih leh Durtlang BSUP CCC aṭanga chhuak mi pakhat an ni.
Mizoramah Covid-19 vei mi 4,500 hmuh chhuah a ni tawh a, mipa 3,271 leh hmeichhia 1,229 an ni. Nimin tlai dar 5 thleng khan mi 4,447 (98.82%) chhuahtir an ni tawh a, mi 11 (0.25%) thi tawhin, enkawl mek mi 42 (0.93%) an awm.
April 5, Thawhṭanni khan ZMC laboratory-ah swab sample 28, TrueNAT-PCR hmangin Champhai leh Hnahthialah sample 17 leh RAT hmangin district pasarihah sample 690 endik a ni a; sample endik zawng zawng chu 735 niin, chu'ng aṭanga hripui vei hmuh pakua chu 1.22% a ni.
Covid-19 positive hmuh thar mi pakuate chu Mizo pali leh hnam dang panga an ni a, an zingah natna (symptom) lang chhuak pakhat a tel.
April 5, 2021 thlengin Mizoramah swab sample 2,56,032 endik a ni tawh a, chu'ng aṭanga Covid-19 positive hmuh tawh zat 4,500 chu 1.74% a ni. Hripui vei hmuh tawh zinga mi 2,139 chu Mizoram chhunga kái chhâwng an ni a, mi 2,361 chu Mizoram páwn aṭanga an rawn luh hnua hmuh chhuah an ni thung.
Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,666 hmuh chhuah a ni tawh a, TrueNAT-PCR hmangin 679 leh RAT hmangin 1,154 hmuh chhuah a ni tawh.
Covid-19 vei hmuh tharte
ZMC laboratory-a hmuh:
Tlangnuam - 1: Hmeichhia kum 59, tualchhunga kái, kàina hriat, home quarantine lai, symptom nei lo.
Chhinga Veng - 1: Mipa kum 62, tualchhunga kái, kàina hriat, home quarantine lai, symptom nei lo.
RAT hmanga hmuh:
Kulikawn - 1: Mipa kum 27, maxicab driver, March 31, 2021-a Guwahati aṭanga haw, Aizawl a thlen hnuah symptom a neih vanga private hospital-a sample endik.
Lengpui Airport - 2: Lunglawna hmeichhia kum 28 leh hnam dang mipa kum 41, NHIDCL hnuaia thawk, Ṭawipui North-a kal tura Kolkata aṭanga rawn lut, Lengpui Airport-a hmuh chhuah, symptom nei lo ve ve.
BRTF - 4: Mipa kum 22, 37, 37 leh 40; Border Roads Task Force mi leh sa, Jharkhand lam mi, Hnahthiala kal tur, Vairengte Screening Point-a sample endik, symptom nei lo vek.
