CM-in uar lutuka thusawi a sim - Dr Vanlalthlana

ZPM Legislature Party secretary Dr Vanlalthlana chuan, ZPM MLA-te zarah chief minister Zoramthanga'n uar lutuka thusawi a sim niin a sawi. Dr Vanlal­thlana hnenah hian India Student Parliament-ah Ideal Youth MLA Honor Award a dawn avangin ZPM chuan nimin khan lawmpuina an hlân.

Nimina ZPM pisaa inkhawmah thu sawiin Dr Vanlalthlana chuan, Ideal Youth MLA Honour Award a dawn chu phú lo a intih thu a sawi a, "Pathian ropui ber se. Eng vanga dawng nge ka nih ka ngaihtuah thiam lo. Chawimawina hi ka bial mipui­te ka hlan a, khingpuite sawi­sel miah lo leh therhlo sem miah loa MLA-ah a tlin theih tih an lantir vangin. Keima mimal dawn a ni lo a, min thlang tlingtu mipuite dawn a ni. ZPM hi a sorkar hunah chuan hmasawnna kai rual ber lawmman te, state mipui hlim tlanna ber lawmman te, corruption tlem berna lawmmante leh lawmman dang tam tak kan la dawng ang," a ti.

Dr Vanlalthlana chuan, "Budget session-ah khan kan CM hian thil tam tak kha inseprawtui chawpin a sawi vak vak a, a figure sawi kan finfiah deuh zel a, dik lo a awm nual. CM meuhin hetianga thu a sawi ṭhin hi tihtawp tumin ṭhahnemngai takin kan nawr. Mau chi tihpun dante pawh scientist-te'n an la thiam lo ni âwmin a sawi chiam a, kum 1992 khan an ti thei daih tawh tih finfiah a ni," a ti a; MZU-ah pawh ṭhalai mi thiam tak tak an awm a, ráwn hmasa ṭhin tura an ràwn thu leh chu chu CM-in a zâwm dawn nia an hriat thu a sawi.