Mipuite'n min beisei sang bik - ZPM Vice President
ZPM party chuan nimin khan an pisaah Aizawl City Block Leaders Meet an hmang a; ZPM president mawhphurhna la mektu vice president K Sapdanga chuan, ZPM chu kalphung thar tun din tuma inzuar an nih avangin an laka mipuiin beiseina an neih sàn bik thu a sawi.
ZPM Vice President chuan, ZPM chu páwl naupang tak ni mah se Mizoram politics kalphung siamṭhat theih inbeiseia kal khawm an nih thu a sawi a, "Kalphung thar tun din tuma inzuar kan nih avangin mipui min beiseina pawh a sang. Kan laka mipui bûklung khai a rit bik a, kan lakah mipui an duhtui bik tih hi theihnghilh hauh loh tur a ni," a ti.
Politics kalphung ṭha tung ding thei tura an mamawh hmasa ber chu an inpumkhatna a nghet tih mipui hmuhtir a nih thu sawiin Sapdanga chuan, "Kan khingpuite chu kum 50 chuang tawh, kum 15 lai thuneihna pawh lo chelh tawhte ni mah se, politics-ah chuan kan lehpêl thei a ni," a ti a, an khingpuite lehpèl tur chuan an inpumkhat ngheh a ṭul thu a sawi.
K Sapdanga chuan, an party chu an pachhiat thu sawiin, "Kan hotute an inphal a, kan mamawh tam tak min phuhrûksak a ni. Kan hotute'n thawhlawm thawh hmanga pawl enkawl hi pawl himna atan a pawimawh tih an hria a, thawhlawm báwm (contribution) an siam. Tukluih donation hi ZPM chuan ṭha a ti lo a, tih hauh loh tur a ni," a ti.
ZPM Vice President chuan, 'Kalphung thar, mipui sorkar' tih chu an thupui leh auhla ber a nih thu sawiin, "Kalphung thar hi sorkar hun chauha hman tur a ni lo a, campaign atan pawh kan hmang tur a ni," a ti a; kalphung hluia campaign a, kalphung thara sorkar tum chu Isua zirtirna nen a inmil loh thu a sawi.
Political party final game chu inthlan a nih thu sawiin K Sapdanga chuan, "Sum sèn tlem leh tam hi tlinna a ni ber lo tih chu tuna keimahni MLA-teah pawh a chiang khawp mai. Mahni candidate-te ipte zenpui tum tlat block hruaitu nih loh tur. Chutiang rilru kan put chuan, candidate ṭha zawng loin, candidate atan mi hausa kan zawn a ngai ang a, kan hlawhtling ngai lo ang," a ti.