Sum eirûk thubuaiah PWD EE hlui Special Court-in thiam loh a chantir

PWD executive engi­neer ṭhin R Zatawna s/o Darkhuma (L) Chan­mari, Aizawl chu Aizawl District Court-a Special Court (Prevention of Corruption Act) chuan eirûk thubuaiah nimin khan thiam loh a chantir a; kum 3 leh a chanve chhung jail-a táng tur leh Rs. 20,000 chawi turin a hrem.

Special Judge (PC Act) Vanlalenmawia'n nimina Judgement & Order a tihchhuaha a lan danin, R Zatawna hi PWD EE a nih laiin Rs. 6,75,000 eirûa puh a ni a; kum 2006 khan BSNL aṭangin OFC lines phùm nana kawng an tihchhiat siamṭhatna tur Rs. 6,75,000 a dawng a ni.

OFC lines phûmna tur BSNL aṭanga Rs. 6,75,000 a dawn chu demand draft no. 506892 forwarding letter-ah chiang taka ziah a ni a, mahse, official record-ah pawisa a dawn thu leh a hmanna hmuh tur a awm lo.

He thubuaiah hian sorkar ukil lamin thuhretu mi 13 thu an zawtfiah a, R Zatawna'n thuhretu mi pathum a nei thung. Chu'ng bakah chuan, Court-in thuhretu dang pakhat a koh belh bawk.

Sorkar lama thu­hretu,PWD superin­tending engineer Laldela chuan March 18, 2010 khan Rs. 6,75,000 bo chungchang sawifiah turin R Zatawna a hriattir a; R Zatawna chuan, Zawlnuama YMA conference dáwnah kawng siam nan hman a nih thuin a chháng. Chutih laiin, thuhretu dang PWD EE (Rtd) Sangliana chuan pawisa dawn a nih hmain Zawlnuama YMA conference chu a zawh daih tawh thu a sawi thung.

A hnuah R Zatawna chuan pawisa chu Subsidiary Cashbook-ah dah angin a sawi a, kawng chhilh nan hmang angin a insawi bawk. Subsidiary Cashbook chu a thawhpuite'n an hriatpui lo a, a hmana ni àwma a sawi pawh Court chuan a pawmsak lo a ni.

R Zatawna hi IPC Section 477A tlawh-chhanin kum hnih táng tur leh Rs. 20,000 cháwi tura tih a ni a; PC Act Section 13(2) hnuaiah kum 3 leh a chanve táng tur leh Rs. 20,000 cháwi tura tih a ni bawk.

Hremna hi kal kawp nghal tur a ni a, belhkhawm loin, hremna na zawk zawka hrem tur chi a ni. Hei vang hian R Zatawna chu kum 3 leh a chanve táng tur leh Rs. 20,000 cháwi tura hrem a ni.