GAD hnuaia SAD dah duh lohna Secretariat kawtah lantir a ni

Joint Action Commi­ttee on Amal­gamation of GAD & SAD chuan nimin khan Secretariat kawtah General Administration Department (GAD) hnuaia Secretariat Admi­nistration Department (SAD) dah tum duh lohna an lantir. GAD hnuaia SAD dah chu thil ṭha duh vang ni loin, thuneihna duh vanga an ngaih thu an tarlang.

JAC hruaitute chuan, SAD chu Assam state aṭanga Mizoram a indan tirh aṭanga Mizoramin a nei tawh a nih thu tarlangin, "A ṭhatna tur awm chuang si loa state ṭhenkhatte'n an ti tih vang ngawta tih hi a ṭha ber lo thei. Tuna kan awm dan hi kan state tana ṭha leh kan mil tâwk a ni a, a ngai hian awm thei se kan duh," an ti.

GAD hnuaia SAD a awm chuan thil ti thei deuhte tan posting & transfer leh service senio­rity chungchangah thil dik lo tihna a la thlen an hlauh thu JAC hruaitute chuan an tarlang a ni.

Department pahnih chhûn fin tum a nih danah kalphung pangngai loa thil kalpui a nia an hriat thu tarlangin, "Sorkarin kalphung fel tak a neih sa chu department ṭhen hran (bifurcate/trifur­cate), chhûn fin (amalgate) leh tih­danglam (restructure) a nih dawnin DPAR ràwn ṭhin a ni a, a ṭul chuan Law & Judicial department pawh ràwn ṭhin a ni. Tuna hmalaknaah hi chuan anni depart­ment hi ràwn a ni lo," an ti a, SAD pawh hriattir an nih loh thu an sawi.

JAC hruaitute chuan, GAD leh SAD chu chhûn fin kher loin, thawhho dan tur ṭha zawk siam rem theih a nih thu an sawi a, "Secretariat-a thawkte buaina zakhua a thlen loh nan SAD hi a kal ngaiin kal se tih hi kan duh dan a ni. Thil ṭha pangngai sa, a ṭha zawk tur ni chuang loa tihdanglam tum ringawt hian rah ṭha a chhuah a rinawm loh. Tih tlang a nih chuan Mizoram sorkar hmunpui bera thawkte rilru natna a thlen nasa hle dawn a ni," an ti.

SAD hnuaiah hian department 44 an awm a, GAD hnuaiah deputy commissioner, Mizoram House, Aviation Wing, Protocol & Hospitality Wing, Sinlung Hills Council, State Information Commission, Sialkal Range Development Council, etc. an awm thung.

JAC on Amalgamation of GAD & SAD hian GAD hnuaia SAD awmtir tumna an duh loh thu leh Cabinet meeting chu GAD hnuaia SAD dah lo tura an duh thuin an au rual a; an beisei anga Cabinet-in thutlukna a siam loh chuan hmalak zui zel an tum a ni.