KHAWTHLIR

Tanpuina sum hlân
MZP, PUMP, MZI leh MDM-te'n Myanmar ram tualchhung buai vanga harsatna tawk Zo hnahthlakte ṭanpuina tura March 20, 2021-a Aizawla Mobile Charity Concert an buatsaiha sum an hmuhte chu nimin khan United for Democratic Myanmar (MUFDM) hruaitute hnenah an hlân. Ṭanpuina inhlanna inkhawm hi MZP pisaah neih a ni a, sum thawh khawm an dawn Rs. 5,19,009 chu MZP finance secretary Chinkhanmanga Thomte-in UFDM hruaitute hnenah a hlan a ni.

MNF VC ding
Lunglei Zohnuai leh Phaileng South-a VC member-te'n MNF party an zawm avangin heng khua/veng pahnihah hian MNF kaihhruai VC a ding. MNF tarlan danin, Zohnuaiah VC member panga awmin, ZPM member pahnihin MNF an zawm avangin MNF member pakhat awm sa nen MNF hruai VC an din. Phaileng South-ah VC member pathum an awm a, ZPM leh Congress ticket-a thlan tlinte'n MNF an zawm avangin MNF hruai VC an siam bawk a ni.

SRH-ah mi 9 awm
State Referral Hospital aṭangin nimin khan Covid-19 laka fihlim tawh mi pahnih chhuahtir an ni a, enkawl mek mi pakua an awm. SRH-ZMC Bulletin tarlan danin, hripui vei SRH-a enkawl mek zinga pahnih chu ICU-ah an awm a, hun eng emaw chen ventilator hmanga enkawl tawh chuan ventilator a mamawh tawh lo. ICU leh Isolation ward-a awm zingah ngaihtuahawm an awm lo a ni.

Thawhpuiah sáwm
AMC Ward-VIII bialtu councillor Christina Roluahpuii Sailo chuan nimin khan a bial chhunga veng pathum - Armed Veng, Armed Veng South leh Chite Veng local council hruaitute a kâwm a, an ward hmasawnna atana theihtawp chhuahpuiah sáwmin, "Inthlan a zo tawh a, party rilru dahṭhain, kan khawtlang hmasawnna i ngaihtuah ang u. Inthlan dawna ka intiam ang ngeiin theihtawp ka chhuah dawn a ni," a ti.