HSLC leh HSSLC exam neih mek a ni

Mizoram Board of School Education (MBSE) chuan High School Leaving Certificate (HSLC) leh Higher Secondary School Leaving Certificate (HSSLC) Examination 2021 an buatsaih mek. Exam-ah hian Covid-19 vei an awm palh pawha inkài darh a nih loh nan uluk takin thil tih a nih thu School Education department chuan an tarlang.

HSLC Examination chu April 1, 2021 khan ṭan a ni a, HSSLC Examination chu nimin khan ṭan ve leh a ni. HSLC-ah hian centre 116 awmin, high school 679 aṭangin candidate 18,738 an awm a, candidate hi nikum aiin 144-in an tam. HSLC exam hi April 15-ah zawh a ni ang a, June thla chawlhkar hmasa berah result tihchhuah tum a ni.

HSSLC-ah chuan exam centre 86 awmin, HSS 186 aṭangin candidate 11,849 an awm a, nikum aiin zirlai 760-in an tlem zawk. HSSLC exam hi April 30-ah zawh a ni dawn a, result chu June thla chawlhkar hnihna emaw, chawlhkar thumnaah emaw tihchhuah theih beisei a ni.

School Education department chuan, academic session 2020-21-ah hripui léng vangin rei tak sikul khâr a nih avangin kumina board exam chu kum dang aia strict lo emaw, ngaihhnathiamna tam deuh turah emaw mi tam takin an ngai thei tih a tarlang a, "Sorkar chuan a tih turte a theih angin a hlen chhuak tawh a, HSSLC leh HSLC pawh hi dik leh felfai takin, kum dang ang bawka strict-in buatsaih a ni," an ti.

HSLC/HSSLC atana inbuatsaih dan
→ Syllabus chu 30%-in tihtlem a ni. Hei hi India ram hmun danga an tih dan a ni a, CBSE leh state danga board dangte pawhin an tihdan a ni.
→ Examination scheme ennawn a ni a, zawhna awl chi (easy question) pawh kum dang aiin 10%-a tihtam a ni.
→ Zirlaite an inbuatsaih thiam theih nan sample question paper buatsaih a ni.
→ School khâr ni mah se, zirna kalpui reng a ni a; MBSE chuan, zirlaite'n kar tina an zir tur kawhhmuhna leh kaihhruaina week-wise plan siamin, chawlhkar 16 daih siam a ni.
→ School Education leh SCERT-te Youtube channel bakah, TV-ah tutorial class hmangin April 2020 aṭanga March 2021 chhungin cable TV-ah ni tin zirtirna inpek a ni.
→ Zirlaite'n phone hmanga zirtirtute an ràwn theihna turin ruahmanna siam a ni.
→ Sikulah ràwn theihin zirtirtute an awm ṭhin.