Ran natna chungchang inzirtir

Champhai AH&Vety department chuan nimin khan Champhai chief veterinary officer (CVO) Dr C Lalsawiṭhuama hoin Myanmar ramri depa awm Champhai Tlangsam khuaah ramri kaltlanga ran natna inkài chhàwn theih hrang hrang inzirtirna an buatsaih a, bawrhsap Maria CT Zuali'n a hmanpui.

Maria CT Zuali chuan, African Swine Fever (ASF) lakah Champhai district a him theihna turin ram dang leh state dang aṭanga vawk, vawksa leh vawksa aṭanga siam thilte lâk luh khapna thupek chu thla hnih awh turin February 22, 2021-ah chhuah a nih tawh thu a sawi.

Bawrhsap chuan, Champhai district-a khaw pakhat aṭanga khaw danga vawk la lut emaw, phur chhuak tur emaw chuan AH&Vety department phalna lâk hmasak a ṭul thu leh permit la tur chuan VC president, YMA hruaitu leh Vety department emaw, Vety department awm lohnaah community-based animal health worker hnen aṭangin hriatpuina lak hmasak a ṭul thu a sawi bawk.

Inzirtirna hunah hian VC member, vawk vulhtu leh tlawmngai pawl hruaitute an tel a; vawk natna a lèn thulha invèn dan tur te, vawk-in tihthianghlim dan leh damdawi hman tur te, vawk thi sâwngbàwl dante an zirtir a ni.