Setana pawl inti khawpin politician-te kan la insawi ngai lo - Rosiamngheta

Mizoram Pradesh Congress Committee (MPCC) secretary Rosiamngheta chuan nimin khan Aizawl Press Club-ah thuthar thehdarhtute a kâwm a; Setana pawl inti khawpin politician-te an la insawi ngai lo niin a sawi.

Rosiamngheta chuan, ZPM-te'n March 27, 2021-a Serchhip campaign hawnna an neih ṭumin ZPM vice president Rev. Dr K Thanzauva'n fing, fel leh ṭha bik ni awm takin political platform-ah an khingpuite Setana pawl tiin a sawi tih a sawi a, "Thlarau Thianghlim aṭanga chhuak leh tihpalha sawi a ni lo tih a chiang. Kan hun kal tawhah Setana pawl inti khawpin politician-te kan in-address ngai lo. Kristian thlirna aṭang chuan chatuana hrem tura dah tawh Setana pawl intihkhum hi chatuan hawlh ṭawng chhe ber a ni," a ti.

Rev. Dr K Thanzauva chu Pathianin rawng­bawlna hun a pek hmang zo tawh a nih thu sawiin Rosiamngheta chuan, "Ṭha bik leh fel bika la inhre rengte kaihhruaina hi Zoram hian kan mamawh loin kan mi zawn a nih a rinawm loh," a ti a; a chak lo berte pawh an lenna tur siam aia mahni ropuina leh thuneihna duhtute chu an kal sual fo niin a sawi bawk.