MNYF-in an party leh hotupa an timualpho - Congress Ṭhalai

Mizoram Pradesh Youth Congress Committee (MPYCC) chuan, Chapchar Kut Art Exhibition-a lemziak pho chhuah zinga pakhat, MNF president leh chief minister Zoramthanga lem, a ziaktu phalna loa MNF ṭhalaite'n an lak bosak chu MNF party leh an pre­sident Zoramthanga tihmualphonaa an ngaih thu an sawi.

MPYCC chuan thu­chhuah siamin, March 6-7, 2020 chhunga Chapchar Kut puala Vanapa Hall-a Art Exhibition-a lemziah pakhat, Zoramthanga lem chu BJP symbol nena ngaihbel a awm nia an ngaih avangin MNF ṭhalaite'n huain, a ziaktu phalna loin Vanapa Hall aṭangin Mizo Hnam Rûnah an la tih an tarlang a; chu mai bakah, MNYF chuan press release siamin, Zoramthanga lem ziaktu demna thu an tarlang tih an sawi a ni.

Zoramthanga lem ziaktu chuan thil awm dan dik tak a ziak nia an ngaih thu sawiin MPYCC chuan, "Artist-te'n zalenna an neih hmanga politics dinhmun awm dan dik tak a ziak a, MNF-te'n an thawhpui BJP, an hlauhtlawn ni bawk, Zoram mipui hmaa thawhpui lo ang taka lan tum a, an nihna dik tak an hotupa thlalak hmanga lemziaktuin a ziak hi huat tur a awm lohzia leh a ziaktuin thil nih dan a ziak chhuak thiam hi a ngaihsanawm hle zawkah kan ngai," an ti.

Congress ṭhalaite chuan, MNYF-te chuan Zoramthanga lemziak lak bo mai duh tâwk loin, mipui hmaa inthen thianghlim tumin press release an siam a, lemziaktu chu Mizo Hnam Rûnah an ko bawk niin an tarlang a; MNF 

ṭhalaite chêt dan leh thil tih avangin Zoramthanga lem ziah chu mipuiin an hriat tam phah thu leh an chet dan chu MNF leh an president Zoramthanga tihmualpho thuina mai a nih thu an sawi bawk.