Zirtirtu indaih lohna phuhrûk nan Cabinet-in zirtirtu 946 lâk a remti

Council of Minister-te April 22, Thawhṭannia chief minister Zoramthanga hoa Chief Minister's Office (CMO) Cabinet room-a ṭhukhawm chuan, primary leh middle school hrang hranga zirtirtu indaih lohna phuhrûkna atan zirtirtu 946 lak an remti.

School Education department aṭanga agenda lut, 'Proposal for Filling up of Vacant Primary School Teacher and Middle School Teacher on Muster Roll Basis (Skilled-II) in Relaxation of Column 8(2) of Recruitment Rules in Respect of Primary School Teacher and Middle Teacher and All the Existing Office Memorandum Pertaining to Engagement of Muster Roll Employess' tih chu Cabinet-ah hian ngaihtuah a ni a; sawiho a nih hnuah an pawm.

Education department hotute hnen aṭanga thu dawn danin, School Education department Recruitment Rules Column 8(2)-ah hian, primary school leh middle school zirtirtu lak turah Mizoram Teacher Eligibility Test (MTET) paltlang a ngai tih a chuang.

Thawhṭannia Cabinet thutlukna ang chuan, muster roll-a zirtirtu 946 lak turah hian primary school atan MTET-I leh middle school atan MTET-II paltlang kher lo pawh lâk theih a ni dawn. Mizoram Presbyterian Kohhran hnena Govt. Middle School leh Boys Model English Medium Primay School hlan chungchang pawh Cabinet meeting chuan an pawm a; zirtirtu awm sate awm zel dan tur chu hun remchanga ngaihtuah tura tih a ni.

Council of Ministers chuan, The Mizoram (Land Revenue) Amendment Rules, 2019 an pawm a, Rules-a thil dik tâwk lo awm siamṭhatna leh belh ngai awm tihbelhna a ni.

Cabinet thurel dangte
• Mizoram State Institute of Hotel Management chu rang thei ang bera kalpui a nih theihna tura hmalakna pakhat atan post hrang hrang 32 hnawhkhah phalna pek.
• Sports & Youth Services department hmalaknaa Mizoramah State Games neih a nih theihna atan cheng nuai 150 dah.
• Ramvak rûa nungcha tihlum ṭhin te, phalna nei loa thing kit ru ṭhinte an awm ṭhin avangin, Incentive Reward Scheme buatsaih Cabinet chuan a pawm. Dan phal loha heng thil ti ru ṭhinte hria an awm chuan thuneitute hnenah hriattir theih a ni ang a, thil dik lo titute man chhuah kawnga sorkar puitute hnenah Incentive Reward Scheme pek a ni ang.
• Social Welfare department hnuaia hna hrang hrang chak zawka bawhzui a nih theih nan directorate pahnih - Directorate of Social Welfare & Tribal Affairs leh Directorate of Women & Child Development-ah ṭhen a ni a, directorate pahnih inkara thawktu hrang hrangte insem dan tur chu meeting-ah an pawm.
• Draft Mizoram Juvenile Justice (Care & Protection of Children) Rules, 2019 pawm a ni.
• 7th. Pay Commission rawtna zûlzuia MPSC chairman leh member te, State Election Commissioner leh MBSE chairman-te hlawh siamṭhat an pawm.
• Lungleia Army National Cadet Corps (NCC) Mixed Battalion ṭanna tur sum mamawh belhte pawm a ni.