Book of the Year 2018 lawmman hlan

Mizo Academy of Letters (MAL) chuan nimin khan Economics & Statistics directorate conference hall-ah Book of the Year 2018 atana an thlan 'Hringnun hrualhrui' tih ziaktu H Lalrinfela (Mafaa) hnenah lawmman an hlan. Lawmman hlanna inkhawma khuallian, Mizoram Journalists' Association (MJA) president Zonunsanga Khiangte chuan, Mizo ṭawng chu India danpuia 8th. Schedule-ah telh ve ngei a ṭul thu a sawi.

Kum 2018 chhunga Mizo ṭawnga lehkhabu chhuak zinga ṭha bera thlan lawmman hlanna inkhawm hi MAL president Prof. Laltluangliana Khiangte-in a kaihruai a; Book of the Year lawmman chu MJA President-in 'Hringnun hrualhrui' tih lehkhabu ziaktu Mafaa (L) aiawhin a nu Lalrinliani hnenah a hlan a ni. Award hian thuchei leh Rs. 5,000 a keng.

MJA president Zonunsanga Khiangte chuan, Mizo ṭawng chu 8th. Schedule-ah tel ve ngei a ṭul thu leh telh a nih theih nan theihtawp chhuaha ṭan lak a ṭul thu sawiin, "Mizotawng hi 8th. Schedule-ah khung ila chuan, tun ai hian a lêtin a ropui dawn a, kan ṭawng hi a tihausa dawn a ni," a ti a; ziak mite chu ram rohlu, ṭawng dik zirtirtu leh Mizo ṭawng humhalha chhawm nungtu an nih thu a sawi.

MAL president Prof. Laltluangliana Khiangte chuan, Mizo ṭawng humhalh a ṭul tak zet tih sawiin, hnam dang hming leh ṭawng kauchhehin Mizo ṭawng a chîm pil loh nan thapui chhuah reng a pawimawh thu a sawi. Chawhnu lamah MAL Foundation Day lawmna inkhawm hman zui a ni a; MAL vice president C Chhuanvawra kaihruaiin ziak mite kawmna hun hman a ni.

Mizo Academy of Letters hi April 23, 1964-ah din a ni a, kum 1989 aṭangin kum tin Mizo ṭawng lehkhabu chhuak ṭha ber 'Book of the Year' thlangin lawmman an hlan ṭhin.