Bungraw phurh chungchangah CDTU leh ZWC an inrem

Myanmar aṭanga Mizorama bungraw rawn lut, Zokhawthar aṭanga phurh chhuah chungchanga inrem lohna awm chungchangah nimin khan Champhai Circuit House-ah Home additional secretary Lalbiakzama kaihhruaiin Champhai District Trade Union (CDTU) leh Zokhawthar Welfare Committee (ZWC) hruaitute an inbia a, inremna an siam.

CDTU leh ZWC hruaitute thu inhmuh loh avangin March 25, 2019 aṭang khan Zokhawthar aṭangin hmun dangah bungraw phurh chhuah theih a ni lo a, CDTU-te'n Mualkawiah an dang a ni. Hun eng emaw chen Zokhawthar aṭanga hmun danga bungrua phurh sawn a nih loh avang hian bungraw chi hrang hrang cheng nuai 100 chuang man a tangkhang niin an sawi.

Champhai District MJA ruahmannain CDTU leh ZWC-te hi ṭum hnih Champhai leh Zokhawtharah an lo inbe tawh a, mahse, inremna an siam thei lo. Nimin khan Home Additional Secretary hoin CDTU leh ZWC hotute chu an inbe leh a, inremna an siam thei ta a ni. CDTU leh ZWC-te hi bungraw phur truck aṭanga pawisa lak zat leh bungraw phurhtir danah an inrem thei ṭhin lo a ni.

Home additional secretary Lalbiak­zama hnen aṭanga Vanglaini thu dawn danin, an inremna ang chuan, ZWC kaihhruaina hnuaiah Zokhawthar aṭangin bungruate chu Mualkawi thleng phurh a ni ang a, Mualkawi aṭangin CDTU ruahmanna hnuaiah lâk chhâwn leh a ni ang.

Páwl pahnihte chuan inbuatsaihna atan ni khat tal an mamawh tur thu an sawi chu remtihsak an ni a, naktuk aṭang chuan Zokhawthar aṭangin bungruate hmun dangah phurh chhuah leh theih tawh beisei a ni.