KHAWTHLIR

MJA inkhawmpui
Mizoram Journalist Association (MJA) General Conference vawi 46-na chu vawiin hian Mamita IPR confe­rence hall-ah neih a ni dawn a, Mamit DC Dr Lalrozama khuallian a ni ang. MJA inkhawmpuiah hian chawhma lamah Khuallian, MJA president Zonunsanga Khiangte leh Mamit district MJA president C Lalramdinzela ten thu an sawi ang a, report hrang hrang ngaihthlak tur a ni. Chawhnu lamah MJA President kaihhruaina hnuaiah agenda lutte ngaihtuah a ni ang.

Thisen pe
Industrial Training Institute (ITI)-a training-te chuan nimin khan an campus-ah Aizawl Civil Hospital tan thisen unit 61 an pe a, petute mipa 55 leh hmeichhia paruk an ni. Sesawng Pastor Bial KṬP-te pawhin nimin khan Sesawng Kohhran Hall-ah blood donation camp an huaihawt a, Synod Hospital tan thisen unit 34 an pe a, petute mipa 31 leh hmeichhia pathum an ni.

Online-a tih tur
Mizoram sorkar chuan thuchhuah siamin, Mizoram tlawh tur emaw, hna thawka awm emaw tan Foreign Re­gistration Officer, CID (SB) SP office, Bungkawn CID Complex-ah registration ti tura kal ngai ṭhin chu online hmangin indianfrro.gov.in/eservices/home.jsp ah self registration tih tawh tur a nih thu a tarlang a. “Registration hi ram dang mi, Overseas Citizen of India (OCI) card nei tiamin tih ngei tur a ni. Visa nun chhung pêl leh visa sticker ṭum khata India ram awm theih hun chhung pêl tan India ram chhuahsan phalna permit online-in eFRRO, Kolkata-ah dil tur a ni thung,” a ti.

Tlang thianfai
Government Aizawl College (GAC) Ecology Club member-te chuan April 22, Thawhṭanni khan Sialsuk tlanga bawlhhlawhte tihfai hnatlang an nei a; Eco­logy Club member 41 thawk chhuakin, tlanga bawhhlawhte an chhar fai a ni. GAC Ecology Club hruaitute chuan, an hnatlan theih nana remchang siamsaktu Sialsuk V/C chungah lawmthu an sawi a ni.