ICFAI zirlaite'n lungawi lohna an lantir

ICFAI University, Mizoram Student Action Committee (MSAC) chuan March 28, 2019-a lungawi lohna an lantirin awmzia a neih loh avang leh an ngen anga fee tihniam lo a, a ngai anga ICFAI Society Hyderabad-in fee a ruahman leh chu duh loin nimin khan an university tualah lungawi lohna an lantir.

ICFAI MSAC tarlan danin, an thil phut chungchangah Mizoram Chief Minister-in ICFAI Society, Hyderabad hnenah lehkha a thawn a, April 16, 2019 hma ngeia ICFAI MSAC ngennate ngaihven turin a ti a; mahse, chhanna mumal tun thlengin an la pe lo.

April 18, 2019 khan ICFAI University Mizoram registrar Joseph Lalremsanga hmuin, an prospectus-a an fee structure chu thlak danglam turin an ngen a, April 22 chawhma dar 10:30 thleng kha hun an pe. An hun tiam chhungin chhanna an hmuh loh avangin lungawi lohna an lantir ta a ni.

Lungawi lohna lantirnaa pungkhawmte chuan, ICFAI University gate kawtah prospectus an hâl a, an hâl bâng chu ICFAI Society, Hyderbad-ah thawn lêt an tum. Lungawi lohna lantirnaah hian MZP leh MSU hruaitute pawh an tel.

ICFAI University-a thawkte pawhin an service rules leh career advancement scheme chungchangah an lungawi lohnate Society hnenah thlen a; badge dum belin hun rei tak chhung an lungawi lohna an lo lantir tawh. Zirlaite leh thawktute'n lungawi lohna an thlen ṭhinte chu ICFAI Society lamin an bengkhawn ngai lo niin an sawi.

ICFAI MSAC thil phûtte
1) University dangte nena khaikhinin fee a tam uchuak a, kum tin deuh thaw (2007, 2010, 2011, 2012, 2016, 2018)-ahte fee tihsan a ni. Zirlaite tan phurrit a tling a, chhungkaw dinhmun ngaihtuah a, Mizo mipui khawsak mil tâwka tihhniam an duh.
2) Classroom leh laboratory changtlung zawk leh hmantlak, department hrang hrangin an mamawh ang pek.
3) Act leh statute-a tiam a nih angin, khelmual leh co-curricular activity an neih theihna tur siam.
4) University library changtlung zawk, zirlai mamawh phuhru zo ngei lehkhabu dahsak a, zau zawka an zirna atan online journal subscribe.
5) Mimal building-a zirlaite lehkha zirtir lo a, ICFAI campus chhungah ngei zirlaite an len vek theihna tura in sak belh.
6) University syllabus-a awm ngei, study tour, field study leh industrial visit atan an mamawh tawk sum pek.