Swine fever chungchangah Awarness campaign buatsaih

Animal Husbandry & Veterinary department leh College of Veterinary Science, Selesih ṭangkawp chuan nimin khan AH&Vety Polyclinic Hospital conference hall-ah 'Awareness campaign on Preparedness of African Swine Fever' an buatsaih.

Awraness campaign-a an tarlan danin, African Swine Fever hi India ramah report la awm lo mah se, India ram chheh­vel - China, Vietnam, Cambodia leh Mongolia-ahte a awm mek a, November 2018 aṭanga April 11, 2019 thleng khan vawk nuai 2,000 chuang an thih phah tawh a ni.

African Swine Fever hi natna hlauhawm leh inkai chhâwn awlsam tak a ni a, natna pawh lang chhuak hman vak loin vawkte chu an thi zung zung ṭhin. Natna lan chhuah dan chu - Classical Swine Fever (vawk pûl hri) leh PRRS nen pawh inang tak a ni a, laboratory-a endik chauhin hriat hran theih a ni.

African Swine Fever hi virus-in a thlen a ni a, virus chu frozen foods-ah pawh rei tak a dam thei a, sausage aṭang pawhin rei tak a dam thei a ni tih finfiah a ni tawh. He natna hi saphihrik chi khat, Ornithodoros-in a pu darh thei a, sa them nawi aṭangin vawk dangin an kai zung zung thei bawk.

He natna venna tur hian damdawi (vaccine) a la awm lo a, chuvang chuan, ram dang aṭanga vawk leh vawksa aṭanga siam ei tur lak luh chung­changah mi tin an fimkhur a ṭul thu an sawi a ni.