MJA-in pension scheme neih ṭul an ti

Mizoram Journalist Associa­tion (MJA) chuan nimin khan Mamita IPR conference hall-ah General Conference vawi 46-na an hmang a, Mamit DC Dr Lalrozama'n a hmanpui. MJA-te hian pension tuakna tur neih ṭul an ti.

MJA inkhawmpui hi treasurer Lalremsiama'n a kaihruai a; khual­lian Dr Lalrozama chuan, eng hna pawh thawk ila, lungawi tak leh ṭhahnemngai taka thawh tur a nih thu sawiin, "Hna kan thawh chhan kan hre chiang tur a ni. MJA-te hi a chhe zawng leh ṭha zawnga mipui kaihhruai theitu mi pawimawh an ni a, Mizo ṭawng humhalh kawngah pawh chanchinbumite hi mi ṭangkai tak an ni," a ti a; MJA member-te chu ṭan la zel turin a fuih.

Mamit DC hian Mizoram puma MJA member-te'n thawmhnaw inang tlang an neih tur 'vest' a tlangzarh nghal a ni. Mamit bialtu MLA H Lal­zir­liana pawhin thu sawiin, "Sorkar kan duhkhawp lohna leh tih tur kawhhmuh kawngah chanchinbumite'n mawhphurhna sang tak an nei. Thu dik leh belhchian dâwl chauh thehdarh ṭhin ang che u," a ti.

MJA president Zonunsanga Khiangte chuan, chanchinbumite chu hnung lama mit nei ang kara awm a ngaih thu sawiin, "Hawrawp pakhat lek tihsual pawhin nghawng thui tak a nei thei tih hre renga fimkhur a pawimawh. Kan zalennain tawp chin a nei tih kan hriat reng a ṭul. Kan chanchinbute kan sem chhuah hmain proof reading kan nei tur a ni," a ti a; kumtlinglo thil tisual awm palhin ziah fimkhur a ngaih thu a sawi.

MJA Conference-ah hian general secretary C Lalhma­chhuana leh secretary i/c finance Zohmingmawia ten report an pe a, kum 2018-a conference leh kumin conference inkara an member thite sûnna hun an hmang. Chawhnu lamah MJA President kaihhruaiin agenda lutte an rel a; kum 2021-a MJA General Conference neihna atan Lunglei an thlang.

Tun dinhmunah Mizoram pumah MJA member mi 198 an awm mek a ni.

MJA Conference agenda pass-te
• India ram ril zawk leh hmarchhak state sorkar tam zawkte'n journalist pension an pek mek tawh lai hian, Mizoram journalist-te pawhin sorkar puihna nena pension hamṭhatna mahnia tuakna tur, 'The Mizoram Journalist Contributory Retirement Scheme' neih ve thuai ṭul kan ti tak zet. MJCRS a hlawhtlin theihna atan hian corpus fund cheng vbc. 2 min dahsak tur leh, chumi bank interest chu pension fund atana kan dah ang angte do letna atana hman min phalsak turin Mizoram sorkar kan ngen.

• Mizoram sorkarin journalist-te hmun hrang hrang tlawha press tour min neihtir ṭhin hi journalist-te tan mai bakah, mipui leh sorkar tan pawh hlâwkpuina tur eng emaw chen a awm ṭhin a, hetianga sorkarin chanchinbumite a zintir
ṭhin leh, kum 2018-19 ah pawh India ram hmun hrang hrang tlawha journalist team palite press tour min buatsaihsak hi lawmawm kan ti tak zet. Journalist-te chu inzir reng tur kan nih ang leh, mipui leh sorkar tan pawha hlâwkna chhete tal pawchhuak leh turin kum 2019-20 chhung hian India ram chhung mai ni lo, foreign ram thleng pawha Mizoram journalist-te a tam thei ang min tir chhuak a, press tour buatsaih leh turin Mizoram sorkar kan ngen.