CM-in badminton centre sakna tur a tlawh

Chief minister Zoram-thanga chuan nimin zing khan Sihphira badminton zirna hmun tur High Altitude Training Centre (HATC) sakna tur hmunhma leh Sihphir Multipurpose Hall tur sak mek a tlawh a, hna thawh dan tur leh hnathawh mek a enfiah.

High Altitude Training Centre hi Tata Trusts, Pullela Gopichand Badminton Foundation, Mizoram Badminton Association leh Mizoram State Sports Council (MSSC)-te hma­laknaa din tur a ni a, a sak hna chu phase pathuma kalpui tum a ni a, badminton court 16 leh sport discipline dang khelhna hmun awm tura ruahman a ni.

Sihphir Multipurpose Hall chu MSSC hnuaia sak mek a ni a, a sakna atan cheng nuai 1277.79 ruahman niin, 70% vel thawh zawh a ni tawh. Hall-ah hian badminton court pahnih, sepaktakraw court pahnih, fencing hall leh gym awm tura ruahman a ni.

Chief Minister hi Mizo­ram Badminton Association president, minister Lal­chhan­dama Ralte, Sports minister Robert Romawia Royte te, MSSC hotute leh Mizoram Badminton Association hruaitute'n an ṭawiawm a ni.