ZPM-in inthlan hrang hrangah sorkarna siam tura hmalak tum

Zoram People's Movement (ZPM) Exe-cutive Committee nimina an pisa-a ṭhukhawm chuan resolution pass in, Mizorama inthlan hrang hrang awm turah hneh taka sorkarna siam thei tura hmalak an rêl.

ZPM Executive Com-mittee chuan an kal zel dan tur an ngaihtuah a, "ZPM hi pawl hrang hrangte lungrual taka thawhhona, MLA inthlan liam taah pawh Mizoram mipui zara result lungawithlak tak nei tawh kan ni. Mizoram mipuite beisei ang ngeiin, kan hma lama inthlanna hrang hrang kan hmachhawn hunah pawh, party pakhata inhlawm khawm a, ZPM sorkar hneh tak siam thei turin hmalak ni se," an ti.

Mizoram sorkarin middle school leh primary school zirtirtu 946 lak a tum chu zirna siamṭhat aiin party mite induhsakna tur a nih thu sawiin ZPM chuan, "MNF sorkar din hlim khan, Education Minister ngeiin, 'Zirtirtu lak thar hunah recruitment rules ding lai zawm a ni ang,' tia a lo puan tawh chu paihin, MNF mite chauh lak theihna turin dan an siam chawp a ni," an ti a; sorkar chêt dan chu party mi induhsakna hleihluak tak vanga zirna tihchhiat vek theihna nia an ngaih thu an tarlang.