MIMER aiah Zoram Medical College
Chief minister Zoram-thanga hoa April 22, Thawhṭannia Council of Ministers meeting chuan, Mizorama medical college awmchhun, Mizoram Institute of Medical Education and Research (MIMER) tih chu Zoram Medical College tia thlak an rêl.
Thu dawn danin, State Referral Hospital beh-chhana medical college din, MIMER hi CM Zoramthanga kaihhruai Council of Ministers meeting-ah a hming thlak rawt a ni a, agenda-ah chuan 'Mizoram Medical College' tia thlak rawt a ni. Cabinet meeting chuan, agenda-a rawtna chu tidanglamin, 'Zoram Medical College' tia thlak a rel thlu ta a ni.
MIMER hi August 7, 2018 khan hawn a ni a, August 8-ah orientation class ṭan niin, nikum August thla tawp lam khan class pangngai ṭan a ni. Medical college hming atan hian June 9, 2013-ah 'Mizoram Institute of Medical Education & Research' (MIMER) tih chu thlan a ni.
Medical Council of India (MCI)-in MIMER hi ṭum eng emaw zat an endik hnuah pawmin, May 15, 2018-ah Ministry of Health & Family Welfare hnenah recommendation a thawn a; Health Ministry chuan May 22, 2018-ah medical college din phalna, Letter of Permission a tichhuak.
MIMER hian a kum khatna a hmang mek a, kum khatnaah hian subject pathum - Anatomy, Physiology leh Biochemistry-te awmin, zirlai 100 velin an zir mek. A kum hnihna 2019-20 aṭangin subject dang panga - Microbiology, Pathology, Pharmacology, Forensic Medicine and Toxicology leh Community Medicine-te hawn tum a ni a; chumi atan chuan MCI-in an endika an pawm leh phawt a ngai a, MCI endik an nghak mek tih, MIMER hotute chuan an sawi.