Aizawla khaw lum ber ni - April 24, 2019

Hriat theih chinah nimin April 24, 2019 kha Aizawla khaw lum ber ní a ni a, temperature tehnaah Censius degree 37.8 a kai a, hei aia sang hi Aizawla temperature tehnain a la kâwk lo.

Directorate of Science and Technology hnuaia Meteorological Centre-in an chhinchhiah chinah, April 22, 2019 hma lam zawnga Aizawl lum ber ní chu April 13, 2017 kha a ni ṭhin a, hemi nía temperature chu Celsius degree 36.5 a ni. Hun eng emaw chen Aizawl khaw lum ber ni record chu April 22, Thawhṭanni khan khûm a ni a, April 22-a temperature chu Censius degree 37.3 a tling.

April 22, 2019-a record thar chu a tûk, April 23, Thawhlehnia temperature-in a khûm leh nghal a, Thawhlehnia temperature san lai ber chu Censius degree 37.5 a ni. April 23-a record thar pawh chu nimin khan Censius degree 37.8-in khûm leh nghalin, record thar a awm leh nghal a ni.

Tunlaia Mizorama khaw lum chungchangah April 18, 2019-a Science & Technology hotute leh mithiamte an meeting-naah Science & Technology-a scientific officer i/c Meteorological Centre K Lalrammuana'n Aizawlah a kum têlin khua a lum telh telh thu leh, khaw vâwt pawh a vîn tial tial a, temperature hniam lai ber a hniam telh telh tih a lo sawi tawh a ni.