Dan dik loa zirtirtu lak tumah MNF puh

Congress party chuan nimin khan thu­chhuah siamin, MNF party kaihhruai sorkar chu ram dan bawhchhiaa zirtirtu lak tumah an puh a, MNF thil tih duh dan chu Mizoram leh hnam tan a la pawi hle dawna an ngaih thu an tarlang.

MPCC Communication department chuan, School Education minister Lalchhandama Ralte-in March 15, 2019-a Assembly session-ah, 'MR zirtirtu lâk tum thuah hian danin a phût ang ngeia tlingte lak an ni ang,' tia a sawi tawh chu April 22, 2019-a Council of Ministers meeting-in an nâwt reh a, dan loa zirtirtu lak dan tur ruahmanna an siam tih an tarlang a ni.

Congress party chuan, April 22, 2019-a Council of Ministers meeting-in primary school leh middle school zirtirtu 946 lak a remti chu thil lawmawm tak a nih thu an sawi rualin, "India ram pum dan khat hnuaia zirtirtu lak dan kalphung duangtu National Council for Teacher Education (NCTE) dan bawhchhiatna tur a ni," an ti.

Cabinet meeting-in 'Proposal for filling up of vacant primary school teacher and middle school teacher on muster roll basis (skilled-II) in relaxation of column 8(2) of Recruitment Rules in respect of primary school teacher and middle teacher and all the existing office memorandum pertaining to engagement of muster roll employees' tih agenda an pawm a; chu chu Right to Education Act-in a phût anga MBSE-in Mizoram Teacher Eligibility Test (MTET) paltlang ngai a tih chu a thaichhe ta tih MPCC chuan an sawi.

MPCC tarlan danin, RTE India sorkarin statutory board a din NCTE-in a rawtna angin India sorkarin August 23, 2010-ah gazette a chhuah a, RTE Act Clause (n), Section-2 ang­in, pawl 1-8 zirtirtu turin Teacher Eligibility Test (TET) paltlang ngei a ngai a; TET bakah, Diploma in Elementary Education emaw, Bachelor of Elementary Education emaw, Diploma in Education neih a ngai bawk.

Sorkar laipuiin sorkar sikula zirtirtu ni turin TET paltlang ngei leh D.El.Ed. / B.El.Ed. / D.Ed. nei ngei tura a tih laia MNF sorkarin ram dan a palzût chu Mizo mipui, zirlaite leh zirtirtu nih tuma sum leh pai tam tak sênga thiamna ngai zir chhuak tawh Mizo ṭhalaite hmuhsitna a nih thu an sawi a, "Zirna ṭha duha theihtawp chhuaha MTET buatsaihtu MBSE ṭhahnemngaihna tiṭhuanawp zawnga sorkarna chelhtute an che hi Mizoram tan, kan tu leh fate tan thil pawi tak a ni," an ti.