Lokyukta-ah complaint pakhat a lut tawh Hna kan la thawk ṭha thei lo - Chairman

Mizorama Lokayukta din a nih hnuah complaint pakhat thehluh a ni tawh. Hetih lai hian, thawktu an la awm mumal loh avangin Lokayukta hian hna a la thawk ṭha thei lo.

Vanglaini palai zawhna chhangin Lokayukta chairman C Lalsawta, IAS (Rtd.) chuan, Mizorama Lokayukta din a nih hnuah complaint pakhat a luh tawh thu a sawi a, "Kan concern department Law & Judicial-ah kan thawn a, lo zir chiang a, rawtnate siam turin ka ti. Kei pawhin complaint lut hi ka zir chiang a, department aṭanga rawtnate a lo luh hunah complaint kalpui zel dan turah thutlukna siam a ni ang," a ti.

C Lalsawta chuan, Lokayukta-ah thawktu an la awm mumal lo tih sawiin, "Engtiangin nge sorkarin a kalpui dawn kan la hre lo. Thawktu lak dawnin MPSC kaltlang zel a ngai tih a ni a, muster roll leh deputation-te pawh lak an nih dawn chuan MPSC kaltlang vek tura tih a ni," a ti a; thawktu lak lamah harsatna an tawh thu a sawi.

Lokayukta Chairman chuan, tun dinhmunah Lokayukta-ah hian chairman leh thawktu tlemtê bak an awm lo tih sawiin, "Member awm tur pahnih hnawhkhah a la ni lo a, secretary post pawh tihfel a la ni lo. Thawktu kan la awm mumal loh avang hian hna kan la thawk tak tak thei lo a ni. Lokayukta Secretary rank hi Mizoram sorkara secretary rank-ah an dah a, a dil theite'n an dil duh lo a ni mai thei," a ti.

Investigation team leh prosecution team an la neih loh thu sawiin C Lalsawta chuan, "Prosecution leh investigation hi awm kawp tur ang deuha tih a ni a, hei hi a buaithlak dawn. Prosecution lamah chuan public prosecutor tur sorkarah dil a ni a, mahse, sorkarin remti loin, additional public prosecutor lak erawh an remti. Investigation tih dawnin ACB-te kan hmang mai dawn nge tih pawh kan la hre lo," a ti a; additional public prosecutor atan advertisment chhuah tawh nia a hriat thu a sawi.

Lokayukta Chairman chuan, Lokayukta kalphung tur ruahmanaah thil fuh tâwk lo leh dik tâwk lo a awma a hriat thu sawiin, "Tunah hian uluk takin kan zir chiang a, fuh tâwk lo leh dik tâwk lo nia kan hriatte chu siamṭha tura rawtna sorkarah kan thlen dawn a ni. A siamṭhat leh siamṭhat loh erawh sorkar thu thu a ni," a ti.

C Lalsawta hi March 11, 2019 khan Governor Prof. Jagdish Mukhi chuan rinawmna thu tiamtirin Mizoram Lokayukta Chairman atan a la lut a ni. Lokayukta hi tunah hian Bungkawn Vengah mi in luahin kalpui mek a ni.