Aizawl khawpui a lum belh zel Record thar berah degree 37.9C

Tun kar tir, April 22 aṭang khan Aizawla khaw lum ber ní-ah ni tin record thar a awm ziah a, niminah pawh record thar a awm leh a, nimin April 25, khan temperature tehnaah Censius degree 37.9 kaiin, chhinchhiah chinah Aizawla khaw lum ber ní a ni.

Directorate of Science and Tech­nology hnuaia State Meteorological Centre chhinchhiah danin, April 13, 2017 kha hun rei tak chhung Aizawla khaw lum ber ni a ni reng ṭhin a, hemi nía temperature chu Celsius degree 36.5 a ni. Record ding lai hi April 22, Thawhṭannia temperature Censius degree 37.3 hmangin khûm a ni a; April 22-a record thar chu April 23 (degree 37.5C) leh April 24 (degree 37.8C)-ahte temperature-in a khûm leh nghal bawk. April 24-a record thar pawh chu nimin, April 25 temperature-in a khûm leh nghal a, nimina temperature san lai ber degree 37.9C chu record ding lai a ni ta a ni.