MUP president thar - Lalhuapzauva

Mizoram Upa Pawl (MUP) chuan nimin khan Vanapa Hall-ah General Assembly an hmang a; kum 2019-2021 chhung MUP president atan Lalhuapzauva, Bungkawn Veng thlan a ni.

MUP inkhawmpui hi president RK Thanga'n a kaihruai a; khuallian Dr K Beichhua chuan, "Tunlaia kum upa lam aia naupang zawk thi an tam ta hi a veiawm hle. Zu leh ruihhlo dang vanga fahrah, hmeithai an tam tate hi pawi tak zet a, he thil thlentu do tur hian tawnhriat nei ṭha upate in pawimawh. Sorkar chauhin a tih theih loh a nih avangin NGO hrang hrangte nen lungruala do a ngai a ni," a ti.

Dr K Beichhua chuan, zu khapna dan thar Mizoram Liquor (Prohibition) Bill, 2019 chu Assembly House-ah pass ni tawh mah se, Lok Sabha inthlan avangin hman theih a la nih loh thu sawiin, "Inthlan zawh a nih hunah rang taka hman a ni dawn," a ti a; zu khapna dan a hlawhtlin theihna turin upate puihna leh thurâwn an mamawh thu a sawi.

SWD Minister chuan, Mizo zingah khawtlang himna a tlahniam hle tih sawiin, "A bikin hmeichhiaah a zual. Tun ang zela Mizoram a kal chuan kum sawm hnuah chuan khawtlang himna a tlahniam thei dawn a, ṭan lak a ngai hle," a ti.

MUP inkhawmpuiah hian chawhnu lamah ro an rel a, kum 2019 - 2021 chhunga an hruaitu tur an thlang nghal. Hruaitu atana thlan chhuahte chu president-ah Lalhuapzauva (Bungkawn Veng), vice president-ah RK Thanga (Mission Veng), general secretary-ah J Thanglura (Electric Veng), assistant general secretary-ah K Thanmawia (Bungkawn Veng), treasurer-ah R Thankima (Mission Veng) leh finance secretary-ah Vanlalthanga (Nursery Veng) te an ni.

MUP-ah hian general headquarters hnuaiah sub-headquarters pakhat, area 83 leh unit 584 an awm a, member zawng zawng chu mi 64,078 an ni.