KHAWTHLIR

Chawimawina hlân
Ram kâng ṭhelhnaa lung­in a lúa a delh vanga thi Lalngaihzuala, Lungpho khua chu Association for Environmental Preservation (ASEP) chuan nimin khan chawimawina thuchei leh râlna Rs. 5,000 an hlân. Chawimawina leh râlna hlan pah hian ASEP chuan nimin khan Lungpho community hall-ah ramngaw leh nungcha humhalh inzirtirna an buatsaih nghal a, Lungpho khuaa sikul hrang hranga zirlaite an tel.

Thisen pe
GREF Headquarters CE (P) Pushpak chuan nimin khan blood donation camp an huaihawt a, Aizawl Civil Hospital tan thisen unit 24 an pe a, petute zingah hmeichhia pakhat a tel. Institute of Laboratory Science (ILS) pawhin an din champha vawi 10-na lawm nan nimin khan Synod Hospital tan thisen unit 13 an pe a, petute mipa pakua leh hmeichhia pali an ni.

Bial Inkhawmpui
Mizoram Presbyterian Kohhrana pastor bial hrang hrangte chuan zanin aṭang hian an bial ṭheuhah bial inkhawmpui an hmang ṭan dawn. Zanin a ṭan zanah palai lawmna leh report inkhawm neih a ni ang a, natukah nilengin rorel a ni ang. Inkhawmpui hi Pathianni zanah a ṭiak dawn a ni.

Mamit hmasawnna sawiho
Nimin khan Mamit DC Dr Lalrozama hoin a pisaah sorkar official leh Tata Trust NEIDA, Mizoram hotute'n Mamit district chawikan dan tur an sawiho. NEIDA hotute chuan, Mamit district chawikan a nih theih nana chhung­kaw 500-te eizawnna ngêlnghet neih­tir tura an hmalak tum dan te, cheng vbc. 7.35 senna tur project an siamte an sawifiah. Mamit DC chuan, project chu ṭha a tih thu leh a ṭul zualte siam danglam hret a nih hnuah a pawmpui tur thu a sawi.

Saron kawng block
Traffic SP chuan thupek chhuahin, PWD-in Saron Veng huam chhung, Modern School pêng leh Chhinga Venga Tui­thiang pêng inkar kawng siam hna an thawh dawn avangin, April 28 leh May 5 (Pathianni ve ve)-ah zing dar 9 aṭanga hna thawh chhung zawng kawngpuiah lirthei tlan phal a nih dawn loh thu a tarlang.