World Malaria Day pualin hun hmang

Nimin khan Champhai leh Kolasibah World Malaria Day pualin hun hman a ni a, thupui chu 'Zero malaria starts with me' tih a ni.

World Malaria Day hi Champhaiah chuan IPR Auditorium-ah hman a ni a; district malaria officer Dr R Lianmawia chuan, Champhai district-ah sikserh vei tam tak hmuhchhuah ṭhin a nih thu sawiin, "Department lama thawktute leh mipui ṭanrualna vangin tunah chuan Mizorama district zinga malaria tlemna ber kan ni thei hi thil lawmawm tak a ni," a ti.

Dr R Lianmawia sawi dan­in, kum 2018 khan Champhai district-ah malaria vei mi panga hmuh chhuah a ni a, malaria vanga thi an awm lo.

Programme hman zawhah Non-Communicable Disease (NCD) nen thawkhoin CHANEM building ground floor-ah World Malaria Day pualin Mass Blood Collection leh Free Clinic neih a ni a, mi 56 hnen aṭanga thisen lakte endiknaah sikserh hrik hmuh a ni lo.

Kolasib-ah chuan World Malaria Day hi St. Joseph's Parish Hall-ah hman a ni a; Kolasib chief medical officer Dr Lalhlimpuia Sailoin thu sawiin, Kolasib district chuan faina leh thianghlimna kawngah nasa taka hma a sawn thu a sawi a, "Hei hian natna chi hrang hrang ûmbona kawngah kawngro a su hle. Malaria natna vei awm zat pawh Kolasib district-ah a kum tèlin an tlahniam zel a ni," a ti.

World Malaria Day hmannaah hian sikserh laka inven dan tur kawng hrang hrangte chu sikul pariat aṭanga kalkhawm zirlaite'n lemchan hmangin an entir a ni.