Chief Minister Zorama hming chawia MIMER hming thlâk tumah sorkar puh

Congress party ṭha­laite chuan MNF kaih­hruai sorkar chu chief minister Zoramthanga hming chawiin MIMER hming thlak tumah an puh a; MNF sorkar chu thla li chhungin an che buan buan nia sawiin, an in­chhuih thlu mai ang tih an hlauhpui thu an tarlang.

MPYCC chuan, MNF sorkara Cabinet meeting hmasa berah mihring dam laite hminga hmun/thil hming phuah loh an rel laiin, CM Zoramthanga hminga medical college hming thlak an tum tih an sawi a, "Congress sorkar bul ṭan leh kutkawih, MNF kutchhuak ni miah lo MIMER chu rem leh rem loin Pu Zoramthanga hming chawitir tumin Zoram Medical College tiin an thlak leh lawi a ni. Hei hian MNF-te'n thuneihna pumhmawm an châkzia leh principle nghet an neih lohzia a tichiang hle," an ti.

Congress ṭhalaite chuan, "Zoram hmasawnna lam ngaihtuah aiin, MNF sorkar hian sorkar hmun pawimawh hming thlak lama hmasawnna hi a buaipui zel dawn em tih hi kan zawhna a ni," an ti a; MIMER leh a behchhan State Referral Hospital chu MNF sorkar hmasain an tihzûzî leh ár vulhna hmun khawhar taka an chhuah tâk, hralh tuma an zawrh kual a nih thu leh, a hnua Congress sorkarin a din thar leh tâk leh, medical college changtlung taka an din tak a nih thu an tarlang.

MPYCC chuan, MNYF hruaitute'n MIMER an tlawh chu lawm­awm an tih thu an sawi a; Congress sorkarin Mizoram tana rotling an din - sport stadium hrang hrang, Tuirial Hydel Project, Thenzawla Golf Course, Sairang thleng tur rél kawng siam mek, Greater Aizawl Water Supply Scheme Phase-III siam mek, National Institute of Technology, Lengpui, Ayush Hospital, Thenzawl leh hmun dang danga ram ro tling hna thawh zawh tawh leh thawh mekte tlawh zel turin MNF ṭhalai chu an phût.

Sorkar hmasain dan ang taka contract an pek zinga ṭhenkhat, thawh mek leh thawh tur tam tak la neite chu MNF sorkarin dan palzûtin an tihtawpsak nia sawiin MPYCC chuan, "A thawk mekte bill-ah harsatna siam tumin an hmanhlel a, mi harsa tê tê leh damlo ṭanpui ngai, contract hnaa lo innghat vete ṭap leh rûmin an siam duh a ni," an ti. Ṭhalai lehkhathiam tan pawh MNF sorkarah chuan sawipuitu ṭha nei tan lo chuan sorkar hna chu beiseibo anih thu an tarlang bawk.