Zirtirtu train-te chauh lak a ni dawn - MNF Ṭhalai

MNF ṭhalaite chuan thuchhuah siamin, MNF sorkara Cabinet meeting-in zirtirtu 946 lak an remti chu lawmawm an tih thu an tarlang a, zirtirtu lak turah zirtirtu ni tura zir (train) chhuakte chauh lak an ni dawn niin an sawi.

MNYF chuan, Congress sorkarin zirtirtu post ruak hnawhkhah an ngaihthah avangin Education department-ah post ruak 2,000 chuang a awm tih sawiin, "Post ruak hnawhkhat tura sorkarin hma a laknaah duhsak zawng, duh duh lak theih tur ang maiin thu an than a, a pawi kan ti. Sorkarin tuna zirtirtu nghet lo (muster roll) a lak turah hian trained teacher vek lak an ni dawn a ni," an ti.

Sorkarin zirtirtu a lak tur chu Mizoram zirna siam-ṭhatna tur pakhat a nia sawiin MNYF chuan, "Ṭhalai lehkha thiam hna zawng mekte hmakhua ngaihna vang a ni. Labour & Employment-a ṭhalai hna zawng inziak lut hi 2017 khan mi 33,784 an awm. Hna zawng mekte harsatna hi sukiang turin sorkar hian hma a la zel dawn," an ti a; chief minister Zoramthanga leh Education minister Lalchhandama Ralte te chu zirna lama ṭhahnemngai an nia sawiin, a hlâwkna pawh mipuiin an tél dawn niin an tarlang.