Sik leh sa inthlak danglam zel chungchang inzirtirna hun hmang

Mizoram Science, Technology & Innovative Council (MISTIC) hnuaia Mizoram State Climate Change Cell leh Champhai DC Office ṭangkawp chuan nimin khan Champhai College-ah sik leh sa inthlak danglam zel inzirtirna, ‘Climate change awareness programme’ an buatsaih a, district bawrhsap Dr Naveen Aggarwal-i'n a hmanpui.

Dr Narveen Aggarwal chuan, sik leh sa danglam zel chu khawvel kalphung piah lamah, a tam zawk chu mihringte siam chawp a nih thu a sawi a, "Sik leh sa inthlak avangin thlai chìn dan leh hun a danglam a, rannung aṭanga natna kai theihte a hluar zel avangin fimkhur a ngai. Ram tih kan nasat avang leh ṭul lo taka boruak tibawlhhlawh zawnga kan chêt avangin sik leh sa a lo inthlak danglam a, a ven leh dawnsawn kawngah inpuahchah ṭhat a ngai," a ti.

Chief scientific officer Dr RK Lallianthanga chuan, sorkar laipuiin sik leh sa inthlak danglam chak tak a ngai pawimawh tih sawiin, "A enkawltu tur department hmingah pawh Ministry of Environment, Forest & Climate Change tih a ni. Himalayan region-a state hrang hrangah nasa taka ṭan lak a ni. Mizoramah pawh sik leh sa danglam chak tak venna kawngah zirtirna kalpui ṭhin a ni," a ti a; mi tinin an phâk tawka mawhphurhna an hlen ṭheuh a ṭul thu a sawi.

Dr RK Lallianthanga chuan, Champhai district chu Mizo zinga mi challang tak tak chhuahna leh theihna sang tak nei a nih avangin sik leh sa inthlak venna kawnga mipuite zirtirna leh hmalakna kawngah a thawh hlawk hle a rin thu a sawi a, "Sik leh sa inthlak danglam zel hi khawvel huap ni mah se, mahni theihna zâwn ṭheuha ṭan lak hi mi tin mawh a ni. Mizoramah pawh a lum zual zel a, district hrang hrangahte khaw awm dan chipchiar zawka record-na tur hmanraw ṭha zawk bun tura hmalak tum a ni," a ti.

Awareness programme-ah hian Mizoram Climate Change Cell-a scientist-B Lalthanpuia leh project scientist Dr James Lalnunzira ten thupui thlan bik hmangin thu an sawi a ni.