Mamitah FOCUS chungchang ngaihtuah

Mamit District Level Co­ordination Committee (DLCC) chu nimin khan DC conference hall-ah an chairman Dr Lalrozama, district bawrhsap hoin an ṭhukhawm a; Fostering Climate Resilient Upland Farming System in the North East (FOCUS MIZORAM) chungchang an ngaihtuah.

Dr Lalrozama chuan, Mamit district chu district hnufual, chawisan ngai - Aspirational District a nih angin, hmasawnna tur tam tak an la nei tih a sawi a, "Department hrang hranga thawktute chu kan hmalakna reng rengah inpekna tak tak nen a ṭha thei ang bera kan thawh chu kan mawhphurhna a ni. Hlawh hmuhna atan ringawt thawk loin, mipui rawngbawl kan ni tih kan hriat reng a ṭul," a ti a; FOCUS atana Mizorama district pali thlan zingah Mamit district a tel chu lawmawm a tih thu a sawi.

Meeting-ah hian district programme manager C Lalengzauva'n FOCUS chungchang a sawifiah. C Lalengzauva sawi danin, project hi district pali - Mamit, Champhai, Kolasib leh Serchhip-ahte kalpui a ni dawn a, RD block 11 huam chhunga khaw 272 tuam chhuak tur a ni a, chhung­kaw 64,500 leh mi 3,22,500-in an hmuh theih beisei a ni.

Project atan hian kum 2018 khan International Fund for Agricultural Development (IFAD) nen inremna siam a ni a, kum 2024-a zawh tura ruahman a ni. Nodal agency chu Agriculture department a ni a, project cost pumpui chu cheng vbc. 539.272 tling.

Project-in a tum ber chu - chhungkaw 64,500 talin kut hnathawh aṭanga sum deh chhuah an tihpun leh, sik leh sa nghawng thei lo, kut hnathawha eizawnna ngêlnghet neihtir a ni.