Meghalaya Governor thusawi dem

Meghalaya-a Revo­lution - Ïada la ka Ri (protect our land) chuan state Governor Tathagata Roy-a'n Meghalaya-a non-tribal awmte din­hmun chu kum 1991-a Kashmiri pandi-te nen an in ang tia a sawi chu an dem thu an sawi. 

"State-a dinhmun pawimawh tak chelhtu, boruak ṭha tak hnuaia kan awmho na kara awm ngeiin hetiang thu sawi a, ṭan lam leh thlei bik nei a, thu dik tawk lo a sawi mi hi kan lo ring ngai lo. Leilung fate haw zawnga a thusawi hian, sorkar laipuiin kan state  boruak tichhe tura a rawn tirh  nia ngaihna lian tak a awm a ni. Hetiang zawnga thu sawi hi kan state hian kan mamawh lo tih kan sawilang duh a ni," tiin MLA hlui Adernt Miller Basaiawmoit chuan a sawi a ni. 

Governor Roy hian kar liam ta Zirtawp­nia chanchin thar la­khawmtuten an kawm­naah, Megahlaya-a non-tribal te dinhmun chu a chhiain, a beidawn thlak hle tih a sawi. "Non-tribal te dinhmun hi kum 1991-a Kashmiri Pandit, Kashmir Valley aṭanga hnawhchhuah te ang vel kha niin ka hria," tiin a sawi a ni. Basaiawmoit chuan Governor thusawi hi enliam mai chi a ni lo tih sawiin, ruahmanna fel tak siam lawkna hnuaia Meghalaya-a buaina siam tura rawn tirh pawh a ni mai thei tih a sawi.