Vairengteah Rohingya Muslim mi 8 man

Rohingya Muslim hmeichhe pariat, Mizorama luh tumte chu April 23, 2019 zan khan Vairengte police-te'n an man a, Court-a hruai an nih hnuah Court chuan Mizoram páwna thawn lêt turin a ti.

Kolasib SP Vanlalfaka Ralte-in Vanglaini palai zawhna chhanga a sawi danin, Vairengte police-te'n Mizorama lut tur hnam dangte checkgate-a an endiknaah April 23, Thawhlehni zan khan Rohingya Muslim raltlan nia hriat leh Bangladesh aṭanga India rama rawn lut nia hriat hmeichhe pariatte chu man chhuah an ni a, an vaiin document kawl an nei lo.

Kolasib aṭanga thu dawn danin, Muslim hmeichhiate hi Silchar leh Aizawl inkara tlan maxicab-ah an chuang a; maxicab driver chuan, maxicab counter-a hmeichhiate dahtuin Aizawla phur chho tur leh Zemabawk petrol pump-ah an lo lam tur thu a hrilh niin a sawi.

Rohingya Muslim hmeichhia an mante chu Swaminara Begum, Toyabah Begum, Sanwara Begum, Tasim, Noorkayash, Atariza, Rubina leh Serkhu te an ni.

Muslim hmeichhiate sawi dan chuan, Bangladesh Sabulara hmuna Kutupalong refugee camp a awm an ni a, April 19, 2019-a an bazar tur chu miin motor-ah hlângin an hruai bo a, Silchar an thlenpui a ni. Silchar-ah an thawmhnawte thlâksak an nih hnuah Aizawla kalpui turin April 23 khan maxicab-ah an thawn zui a ni.

Hmeichhe pariatte hi kum 18-22 inkar mi an ni hlawm a; Kolasib SP chuan, April 25 khan Kolasib District Court-ah hruai an nih thu leh, Court chuan Mizoram páwna thawn let tura a tih thu a sawi a, "Court chuan inter-state boundary-a dah turin a ti a, tunah hian thawn let dan tur kan ngaihtuah mek a, kan thawn lêt hun tur tak kan sawi thei rih lo," a ti.

Thu dawnna pakhat chuan, Muslim hmeichhiate hi Court-in Rs. 50 ṭheuh a chawitir a; Mizoram páwna thawn let dan turah, Bagha-a Muslim hruaitute kutah hlan tura ruahman a ni tih a sawi.