AMC by-election la chiang lo

Aizawl Municipal Corporation (AMC) councillor ni lai pahnih MLA atan thlan tlin an nih avangin AMC ward pahnih a ruak a, ward ruak hnawhkhahna atana by-election buatsaih a nih dawn leh dawn loah erawh thutlukna siam a la ni lo.

Vanglaini palai zawhna chhangin state election commissioner (SEC) L Tochhong chuan, AMC rules-ah by-election neih chungchang a awm lo niin a sawi a, "An rules-a by-election chungchang a awm loh thu hi AMC kan hriattir tawh a, anni lam hian UDPA department lamah an thlen ve leh tawh. UDPA department chuan by-election neih a nih theihna atan rules siam an tum thu an sawi," a ti.

SEC chuan, rules awm sa chu ni se by-election chu sorkar ráwn chunga buatsaih mai tur a nih thu sawiin, MC by-election chungchangah sorkar aṭangin thu dawn an la neih loh thu a sawi.

Nikuma MLA inthlanpuiah khan AMC councillor ni lai panga chu candidate an ni a, an zinga pahnih - ward XVI aṭanga thlan tlin C Lalsawivunga (ZPM) leh ward VI aṭanga thlan tlin C Lalmuanpuia (MNF) te chu MLA atan thlan tlin an ni.