MIMER hi research institution ni turin Uluk taka a hming phuah a ni - Hawla

Congress party president Lal Thanhawla chuan, medical college hming atana an sorkar laia a hming an phuah MIMER chu research institution ni turin a tirah uluk takin a hming phuah a nih thu a sawi.

Nimina Congress Bravan-a political session-ah thu sawiin Lal Thanhawla chuan, "MNF-te hian an pu BJP-te tih dan an entawn a ni. Sorkar laipuia BJP sorkar pawhin sorkar hmasa hmun hming sak leh sorkar scheme hmingte an thlak a, Mosolman hmingte thlak an tum a, an ti ngam ta lo a, tam tak an thlâk a ni," a ti a; MNF sorkar pawh hming thlak buaiin an buai tih a sawi.

MPCC President chuan, MNF-te chu an sorkar laia an tihchhiat lailet dêr tawh Congress sorkarin a tungding a, lawm hle tur an nih thu a sawi a, "An lâwm lo a nih pawhin, mipui zah vang tala a der tala lâwm âwm tak an ni. A dintute engahmaha ngai lo ang maia tihdanglam mai mai chi a ni lo. MIMER hi research institution ni nghal tura uluk taka a hming sak a ni," a ti.

Congress sorkar laia Lokayukta chairman atana rawtna lo siam tawh MNF sorkarin an tidanglam lo erawh lawmawm a tih thu sawiin Hawla chuan, "Lokayukta hi a Act leh Rules-te kan peih diam a, dan anga kalpui a nih avangin hmanhmawh hleih theih a ni lo," a ti a; chairman atan Mizo ngei dah an duh avangin C Lalsawta, IAS (Rtd.) an ruahman thu a sawi.

Lal Thanhawla chuan khawvelah mahni thil tuma hlawhchham lailet dêr a, mahni dote hnena inpe chawimawi an awm ngai lo tih sawiin, "Keini'n kan chawimawi chhung chuan kan buai kan buai dawn a ni," a ti.

School Education enkawltu parliamentary secretary hlui Joseph Lalhimpuia pawhin thu sawiin, Congress sorkar laiin Right to Education Act angin zirtirtu turte buatsaih nan kum 2013 atangin MTET buatsaih ṭhin a nih thu a sawi a, "Primary zirtirtu turin mi 2,262 leh middle school zirtirtu atan mi 1,847, an vaiin mi 4,109-in MTET an pass tawh a, chungte chu zirtirtu atana lak tura qualify an ni," a ti.